శివ‌గామి అనే పేరు విన‌గానే ఎవ‌రికైనా రాజ‌మౌళి తెర‌కెక్కించిన బాహుబ‌లి సీరీస్ గుర్తుకొస్తుంది. ర‌మ్య‌కృష్ణ శివ‌గామి పాత్ర‌లో జీవించారు. ది రైజింగ్ ఆఫ్ శివ‌గామి పేరుతో ఓ పుస్త‌కం విడుద‌లైన సంగ‌తి కూడా తెలిసిందే. తాజాగా ఆ పుస్త‌కం ఆధారంగా వెబ్‌సీరీస్ తెర‌కెక్కుతోంది.

అందులో మృణాల్ ఠాకూర్ శివ‌గామిగా న‌టించనున్నారు. అందులోనే శ్రియా శ‌ర‌ణ్ కూడా ఓ పాత్ర పోషిస్తున్నారు. శివ‌గామి త‌ల్లిగానా? ఇంకేమైనా పాత్రా అనేది తెలియాల్సి ఉంది. బాహుబ‌లి చిత్రంలో ఛాన్స్ ఆమెను వెతుక్కుంటూ వెళ్ల‌క‌పోయిన‌ప్ప‌టికీ, వెబ్‌సీరీస్ ఆమె త‌లుపుత‌ట్టేస‌రికి శ్రియ‌కు చాలా ఆనందం క‌లిగింద‌ట‌.

క్రిష్ ద‌ర్శ‌క‌త్వంలో నంద‌మూరి బాల‌కృష్ణ స‌ర‌స‌న ఆమె న‌టించిన గౌత‌మీపుత్ర శాత‌క‌ర్ణిలో ఆమె న‌ట‌న చూసిన త‌ర్వాతే వెబ్‌సీరీస్ రూప‌క‌ర్త‌లు ఆమెను సంప్ర‌దించార‌ట‌. ఆమె షూటింగ్ కూడా త్వ‌ర‌లోనే ప్రారంభం కానుంద‌ని వినికిడి.