இளையதளபதி விஜய் நடித்த 'துப்பாக்கி', 'கத்தி' ஆகிய இரண்டு சூப்பர் ஹிட் படங்கள் உள்பட பல வெற்றி படங்களை இயக்கிய இயக்குனர் ஏ.ஆர்.முருகதாஸ், தற்போது இயக்கி வரும் பாலிவுட் படமான 'அகிரா'. இந்த படம் கிட்டத்தட்ட முடிவடையும் நிலையில் உள்ளது. இந்நிலையில் ஏ.ஆர்.முருகதாஸ் இயக்கவுள்ள அடுத்த படம் குறித்த செய்திகள் வெளிவந்து கொண்டிருக்கின்றன.

ஏ.ஆர்.முருகதாஸ் இயக்கவுள்ள அடுத்த படத்தில் தெலுங்கு சூப்பர் ஸ்டார் மகேஷ்பாபு நடிப்பது உறுதியாகியுள்ள நிலையில் இந்த படத்தில் மகேஷ்பாபுவுக்கு ஜோடியாக நடிக்கும் நடிகை குறித்த தகவல்கள் தற்போது வெளிவந்துள்ளது.

பிரபுதேவா கதாநாயகனாக நடித்த ;ABCD 2' உள்பட பல பாலிவுட் வெற்றி படங்களில் நடித்த ஷாரதா கபூர் ஏ.ஆர்.முருகதாஸ்-மகேஷ்பாபு படத்தில் நாயகியாக நடிக்கவுள்ளதாகவும், இதுகுறித்த இறுதிக்கட்ட பேச்சுவார்த்தை நடைபெற்று வருவதாகவும் கூறப்படுகிறது.

மேலும் இந்த படம் மும்பையை பின்னணியாக கொண்ட கதையம்சம் கொண்ட படம் என்றும் கூறப்படுகிறது. மும்பையை பின்னணியாக கொண்டு நாயகன், பாட்ஷா உள்பட பல வெற்றி திரைப்படங்கள் ஏற்கனவே வெளிவந்துள்ள நிலையில் மேலும் ஒரு மும்பை பின்னணி படம் உருவாகவுள்ளது என்பது குறிப்பிடத்தக்கது. தமிழ், தெலுங்கு என இருமொழிகளில் உருவாகவிருக்கும் இந்த படத்தின் படப்பிடிப்பு விரைவில் தொடங்கும் என எதிர்பார்க்கப்படுகிறது.