చేతులెత్తి దండం పెడుతున్నా.. భారత్ సాయం కావాలి!
- IndiaGlitz, [Saturday,April 11 2020]
కరోనా మహమ్మారితో మన దాయాది దేశం పాకిస్థాన్ విలవిలలాడుతోంది. మొత్తం సుమారు 5వేలు పాజిటివ్ కేసులు నమోదవ్వగా.. 77 మంది మృతి చెందారు. రోజురోజుకు మరణాల సంఖ్య పెరుగుతోందే తప్ప అస్సలు అదుపులోకి రావట్లేదు. ఒకానొక సందర్భంగా ఆ దేశ ప్రధాని ఇమ్రాన్ ఖాన్ సైతం చేతులు ఎత్తేసినట్లుగానే మాట్లాడారు. అయితే రావల్పిండి ఎక్స్‌ప్రెస్‌ షోయబ్ అక్తర్ రంగంలోకి దిగాడు. అసలే ఆర్థిక ఇబ్బందులతో సతమతమవుతున్న పాక్‌కు.. కరోనా రూపంలో పెద్ద గండి వచ్చి పడిందని.. దీన్ని నుంచి బయటపడేందుకు భారత్ పెద్ద మనసుతో ముందుకు రావాలని ఆయన అభ్యర్థించాడు. ఇప్పటికే పలుమార్లు సోషల్ మీడియా, మీడియా ముఖంగా మాట్లాడిన ఆయన.. తాజాగా ఓ వీడియో రిలీజ్ చేశాడు.
వీడియోలో ఏముంది..!?
‘మా దేశంలో కరోనా వైరస్‌ని నియంత్రించడానికి భారత్ సాయం చేయాలి. కరోనా వైరస్ బారిన పడిన బాధితులకు చికిత్స అందించేందుకు తగినన్ని వెంటిలేటర్లు లేవు. ఈ విషయంలో భారత్ మమ్మల్ని ఆదుకోవాలి (చేతులెత్తి దండి పెట్టి). మాకు ప్రస్తుతం 10వేలకు పైగా వెంటిలేటర్లు అవసరం ఉంది. అవి లేకపోవడం వల్ల పాక్‌లో మరణాల రేటు ఎక్కువగా ఉంది. మాకు సాయం చేయడానికి భారత్ ముందుకు రావాలి. విభేదాలను పక్కన పెట్టి మానవతా కోణంలో మాకు సాయం చేయాలి. కరోనా విషయంలో ఇరు దేశాలు ఏకం కావాలి’ అని దండంపెట్టి మరీ వేడుకున్నాడు. కాగా.. ఇప్పటికే అగ్రరాజ్యం అయిన అమెరికా విజ్ఙప్తిని మన్నించిన భారత్.. హైడ్రాక్సి క్లోరోక్విన్‌ ఎగుమతికి అంగీకరించిన విషయం విదితమే. మరి పాక్‌ విషయంలో భారత్ ఎలా రియాక్ట్ అవుతుందో జస్ట్ వెయిట్ అండ్ సీ..!