பிரபல கிரிக்கெட் வீரர் தோனி மற்றும் அவரது மனைவி சாக்ஷி தோனி ஆகிய இருவரும் இணைந்து தொடங்கிய தோனி எண்டர்டெயின்மென்ட் நிறுவனம் தயாரிக்கும் முதல் திரைப்படம் 'எல்.ஜி.எம். ரமேஷ் தமிழ்மணி இயக்கத்தில் உருவாகி வரும் இந்த படத்தில் ஹரிஷ் கல்யான், இவானா, நதியா உட்பட பட பலர் நடித்து வருகின்றனர்.

கடந்த ஜனவரி 27ஆம் தேதி இந்த படத்தின் அறிவிப்பு வெளியானது என்பதும் தற்போது படப்பிடிப்பு பணிகள் விறுவிறுப்பாக நடைபெற்று வருகிறது என்பது குறிப்பிடத்தக்கது.

இந்த நிலையில் தோனி எண்டர்டெயின்மெண்ட் நிறுவனத்தின் தலைவர் விகாஸ் ஹசிஜா என்பவர் இந்த படத்தை பற்றி கூறும்போது, ‘படப்பிடிப்பு நடைபெற்று வருகிறது என்பதால் நாங்கள் மகிழ்ச்சி அடைகிறோம். தமிழில் தோனி என்டர்டைன்மென்ட் நிறுவனம் தயாரிக்கும் முதல் தமிழ் படம் இது. இன்னும் பல தமிழ் திரைப்படங்களை உருவாக்குவோம் என்று நம்புகிறோம். தாக்கத்தை ஏற்படுத்தக்கூடிய கதைகள் நாடு முழுவதிலும் உள்ள பார்வையாளர்களை சென்றடைய வேண்டும் என்பதை நோக்கமாக கொண்டு உள்ளோம். இந்த படம் பொழுதுபோக்கு கதைஅம்சம் கொண்டது என்று தெரிவித்துள்ளார்.

தோனி எண்டர்டெயின்மெண்ட் நிறுவனத்தின் கிரியேட்டிவ் தலைவர் பிரியன்ஷு சோப்ரா அவர்கள் கூறிய போது 'எல்.ஜி.எம். படத்தின் படப்பிடிப்பு விறுவிறுப்பாகவும் வேகமாகவும் நடைபெறுவது மகிழ்ச்சியாக உள்ளது, சாக்‌ஷி அவர்கள் தேர்வு செய்த இந்த கதை தனக்கு மிகவும் பிடித்திருந்ததாகவும் ரமேஷ் ஒரு பொழுதுபோக்கு திரைக்கதையை எழுதியுள்ளார் என்றும் மிகவும் கவர்ச்சியான பொழுதுபோக்கு அம்சம் உள்ள இந்த படத்தை நான் மிகவும் ஆவலுடன் காத்திருக்கின்றேன் என்றும் அவர் தெரிவித்துள்ளார்.

பிரபல நடிகர் யோகி பாபு உட்பட பலர் இந்த படத்தில் நடித்து வருகின்றனர் என்பதும் விஸ்வஜித் ஒளிப்பதிவு செய்யும் இந்த படத்திற்கு இயக்குனர் தமிழ்மணியே இசையமைக்கிறார் என்பது குறிப்பிடத்தக்கது.