ప్రస్తుతం బాలీవుట్ నుంచి కోలీవుడ్ వరకు పాన్ ఇండియా మూవ్‌మెంట్ నడుస్తున్న సంగతి తెలిసిందే. భారతీయ సినిమా మార్కెట్ విస్తృతి పెరగడంతో అన్ని రాష్ట్రాలను, అన్ని భాషలను అలరించేందుకు గాను అన్ని ఇండస్ట్రీలకు చెందిన నటులకు తమ ప్రాజెక్ట్‌ల్లో అవకాశాలు ఇస్తున్నారు. అంతేకాదు.. బడ్జెట్‌ను ఏ మాత్రం కేర్ చేయడం లేదు. మల్లూవుడ్ కూడా సినిమాల నిర్మాణంలో ఇప్పుడు జోరు పెంచింది. మంచి చిత్రాలు తీస్తారని పేరున్న ఈ ఇండస్ట్రీ మలయాళం ఇతర దక్షిణాది రాష్ట్రాలకే తన పరిధిని పరిమితం చేసుకుంది. కానీ కరోనా లాక్‌డౌన్ సమయంలో మలయాళ సినిమాల్లో వున్న కంటెంట్‌కు ప్రేక్షకులు బ్రహ్మారథం పట్టారు. దీనికి తోడు టాలీవుడ్ మొదలెట్టిన పాన్ ఇండియా సినిమాల ప్రభావంతో మలయాళ నటులు భారతదేశం మొత్తం పాపులర్ అయ్యారు.

శనివారం వృషభ షూటింగ్ మొదలు :

ఈ ధైర్యంతోనే మల్లూవుడ్ కూడా ధైర్యంగా ముందడుగు వేస్తోంది. మలయాళ సూపర్‌స్టార్ మోహన్ లాల్ హీరోగా రూపొందుతోన్న పాన్ ఇండియా చిత్రం ‘వృషభ’. ఈ సినిమా షూటింగ్‌ శనివారం లాంఛనంగా ప్రారంభమైంది. తెలుగు, మలయాళ భాషల్లో వృషభను తెరకెక్కిస్తున్నారు. నంద కిషోర్ దర్శకత్వం వహిస్తున్న ఈ చిత్రాన్ని ఏవీఎస్ స్టూడియెస్ అధినేతలు అభిషేక్ వ్యాస్, విశాల్ గుర్నాని, జుహీ పరేఖ్ మెహతా, ఫస్ట్ స్టెప్ మూవీస్ అధినేత శ్యామ్ సుందర్, బాలాజీ టెలిఫిలిమ్స్ అధినేత ఏక్తా కపూర్, శోభా కపూర్‌, కంటెంట్ మీడియా అధినేత వరుణ్ మాథుర్ సంయుక్తంగా నిర్మిస్తున్నారు. షూటింగ్ ప్రారంభం రోజున చిత్ర యూనిట్‌పై శ్రీకాంత్ సతీమణి ఊహ క్లాప్ కొట్టారు.

వృషభలో భారీ స్టార్ క్యాస్టింగ్ :

క్యాస్టింగ్ విషయానికి వస్తే.. టాలీవుడ్ సీనియర్ నటుడు శ్రీకాంత్ తనయుడు మేకా రోషన్. బాలీవుడ్ స్టారో హీరో సంజయ్ కపూర్ కుమార్తె షనయా కపూర్‌లు జోడీగా నటిస్తున్నారు. వీరికి తోడు శ్రీకాంత్, రాగిణి ద్వివేది, జహ్రా ఎస్ ఖాన్‌లు కీలక పాత్రలు పోషిస్తున్నారు. కెరీర్ ఆరంభంలోనే దిగ్గజ నటుడితో అది కూడా పాన్ ఇండియా మూవీలో నటించే అవకాశం రావడంతో రోషన్‌ను అంతా అభినందిస్తున్నారు. అంతేకాదు తండ్రి శ్రీకాంత్‌తో కలిసి నటిస్తున్న తొలి సినిమా కూడా ఇదే.