షాకింగ్..: ఇవాళ ఒక్కరోజే తెలంగాణలో 50 కరోనా కేసులు
- IndiaGlitz, [Thursday,April 16 2020]
తెలుగు రాష్ట్రాల్లో కరోనా పాజిటివ్ కేసులు రోజురోజుకూ పెరిగిపోతున్నాయి. మరీ ముఖ్యంగా తెలంగాణలో ఇవాళ ఒక్కరోజే 50 ‘కరోనా’ పాజిటివ్ కేసులు నమోదవ్వడం షాకింగ్ గురి చేస్తోంది. ఇవాళ నమోదైన కేసులతో సహా ఇప్పటి వరకు మొత్తం 700 కేసులు నమోదైనట్టు మంత్రి ఈటల రాజేందర్ మీడియాకు వెల్లడించారు. రాష్ట్రంలో ఇవాళ ‘కరోనా’ మరణం నమోదు కాలేదని, ఈ వైరస్ బారి నుంచి కోలుకున్న 68 మందిని డిశ్చార్జి చేస్తున్నట్టు ఆయన తెలిపారు. ఇప్పటి వరకు పది వేల మందికి వైద్య పరీక్షలు నిర్వహించామని, హైదరాబాద్‌లో ఈ రోజు 800 నమూనాలు పరీక్షించినట్టు చెప్పారు. నమోదైన మొత్తం పాజిటివ్ కేసుల్లో ఎక్కువ మంది ఢిల్లీలోని మర్కజ్ కు వెళ్లొచ్చిన వారేనని చెప్పారు.
ఆంధ్రప్రదేశ్ విషయానికొస్తే..
రాష్ట్రంలోని నమోదైన మొత్తం కేసుల సంఖ్య 534. పాజిటివ్ కేసులకు గాను 20 మంది డిశ్చార్జ్ కాగా.. 14 మంది మరణించారు. ప్రస్తుతం చికిత్స పొందుతున్నవారి సంఖ్య 500. ఇవాళ ఉదయం 09 వరకు జరిగిన కొత్తగా కృష్ణా జిల్లాలో-03, కర్నూల్ జిల్లాలో-03, పశ్చిమ గోదావరి జిల్లాలో -03 కేసులు నమోదయ్యాయి. గుంటూరులో అత్యధికంగా 122 కేసులు నమోదవ్వగా.. ఆ తర్వాతి స్థానంలో 113 కేసులతో కర్నూలు రెండో స్థానంలో ఉంది. ఈ జిల్లాల్లో రోజురోజుకూ పాజిటివ్ కేసులు పెరుగుతూనే ఉండటం గమనార్హం.