మందు బాబులకు షాక్.. కరోనా వ్యాక్సిన్ తీసుకుంటే
- IndiaGlitz, [Saturday,December 12 2020]
కరోనా మహమ్మారిని నివారించడంలో భాగంగా ఇప్పడిప్పుడే ఒక్కొక్కటిగా వ్యాక్సిన్లు బయటకు వచ్చేందుకు సిద్ధమవుతున్నాయి. దాదాపు అన్ని వ్యాక్సిన్‌లకు సంబంధించిన ట్రయల్స్ చివరి దశలో ఉన్నాయి. అయితే ఈ వ్యాక్సిన్లు మందు బాబులకు మాత్రం షాకిస్తున్నాయి. కరోనా వ్యాక్సిన్ తీసుకున్న వారు రెండు నెలల వరకూ మందు ముట్టకూడదట. ఈ విషయాన్ని రష్యాకు చెందిన అధికారులు స్వయంగా వెల్లడిస్తున్నారు. వ్యాక్సిన్ తీసుకోడంలో భాగంగా పలు జాగ్రత్తలను పాటించాల్సి ఉంటుందని వెల్లడించారు.
రష్యాకు చెందిన అధికారులు మాత్రం తమ దేశ పౌరులకు కోవిడ్ వ్యాక్సిన్ తీసుకున్న రెండు నెలల పాటు మద్యానికి పూర్తిగా దూరంగా హెచ్చరిస్తున్నారు. ఈ వార్త అత్యధికంగా మద్యం తాగే దేశాలకు మింగుడు పడని వార్తేనని అధికారులు చెబుతున్నారు. భారత్ వంటి దేశాలకు ఇది చాలా కష్టం. లాక్‌డౌన్ సమయంలో పూర్తి స్థాయిలో మద్యం దుకాణాలను మూసివేస్తేనే ఏమాత్రం నియంత్రణ పాటించేందుకు ఇష్టపడలేదు. శానిటైజర్ తాగి ఎంతో మంది ప్రాణాలు కోల్పోయారు. అలాంటిది ఇప్పుడు ఎదురుగా మద్యం దుకాణాలు కనిపిస్తుంటే ఎంత మేరకు నియంత్రించుకుంటారో వేచి చూడాలి.
కాగా.. ఈ వ్యాక్సిన్‌ను తొలిదశలో కరోనా వారియర్స్‌కు ఇవ్వనున్నారు. ఆ తర్వాత దఫదఫాలుగా వివిధ ఏజ్ గ్రూప్‌ల వారికి ఇవ్వనున్నారు. అయితే స్పుత్నిక్ వి కరోనా వైరస్ వ్యాక్సిన్ ప్రభావవంతం కావడానికి 42 రోజుల్లో రష్యన్లు అదనపు జాగ్రత్తలు పాటించాల్సి ఉంటుందని రష్యా ఉప ప్రధాని టటియానా గోలికోవా ఓ ఇంటర్వ్యూలో తెలిపారు. మొత్తానికి వ్యాక్సిన్ వచ్చేస్తుంది. ఈ వ్యాక్సిన్ తీసుకుని కొన్ని జాగ్రత్తలను పాటిస్తే మహమ్మారి నుంచి విముక్తి పొందవచ్చు.