"రిటర్న్ గిఫ్ట్" ఇప్పుడీ పదం తెలుగు రాష్ట్రాల రాజకీయాల్లో తెగ వినిపిస్తోంది. అయితే అది కాస్త టాలీవుడ్‌కూ పాకింది. ఎస్ నాకు గిఫ్ట్ ఇచ్చారు.. నేను కూడా రిటర్న్ గిఫ్ట్ ఇస్తానంటూ ఇండస్ట్రీలో కొందరు చెప్పుకుంటున్నారు. టీఆర్ఎస్ అధినేత, సీఎం కేసీఆర్ ఏ క్షణాన ఈ పదం అన్నారోగానీ రిటర్న్ గిఫ్ట్ అనే పదం మాత్రం తెగపాపులర్ అయిపోయింది. అయితే ఇలా గిఫ్ట్‌లు ఇస్తామంటున్నోళ్లు ఏ మాత్రం ఇస్తారో అనేది చూడాల్సి ఉంది.

'మా' ఎన్నికల్లో ఓడిపోయిన తరువాత మరోసారి మాజీ అధ్యక్షుడు శివాజీ రాజా మీడియా ముందుకు వచ్చారు. వచ్చీ రాగానే మా కొత్త అధ్యక్షుడు నరేశ్, మెగా బ్రదర్ నాగబాబుపై సంచలన వ్యాఖ్యలు చేశారు. ఈ సందర్భంగా తనపై మా కొత్త అధ్యక్షుడు నరేశ్ చేసిన వ్యాఖ్యలకు స్ట్రాంగ్ కౌంటరిచ్చారు. అంతేకాదు ఏకంగా మెగా బ్రదర్‌కే సవాల్ విసిరారు.

త్వరలో రిటర్న్ గిఫ్ట్ ఇస్తా..

"నాగబాబు నాకు 30 ఏళ్ల స్నేహితుడు. నాకు గిఫ్ట్ ఇచ్చాడు. త్వరలోనే రిటర్న్ గిఫ్ట్ కూడా ఉంటుంది నాగబాబు. చెబుతాను. అది తరువాత చెబుతాను. నాకు ఎన్నో సంవత్సరాలుగా అనుబంధం ఉంది. నేను కుట్రలు చేసేవాడినో.. ఆపదలో ఉంటే ఆదుకునే మనిషినా అనేది మీడియా మొత్తానికీ తెలుసు.. నాగబాబు విషయం తర్వాత మాట్లాడుతాను" అని శివాజీ రాజా చెప్పుకొచ్చారు.

నాకల పై నీళ్లు చల్లారు..!

" నా కల గోల్డేజ్-ఓల్డేజ్ హోమ్‌పై నీళ్లు చల్లారు. ఇటీవల జరిగిన మూవీ ఆర్టిస్ట్ అసోసియేషన్ ఎన్నికల్లో ఓటమికి ఇదో కారణం. ఎక్కడ్నుంచో వచ్చి గోల్డేజ్ హోమ్ కడితే క్రెడిట్ అంతా నాకే వస్తుందనే అక్కసుతోనే ఇలా చేశారు. కొంత మంది పన్నిన కుట్రలో నేను బలైపోయాను. ఈ పేరు వద్దు ఏమీ వద్దు గోల్డేజ్ హోమ్ ఎవరు కడితే కాశీ నుంచి నీళ్లు తెచ్చి కాళ్లు కడుగుతాను మీరే నిజమైన హీరో అవుతారు" అని శివాజీ రాజా సెటైరికల్‌గా మాట్లాడారు. అయితే ఈ రిటర్న్‌గిఫ్ట్ వ్యాఖ్యలపై నాగబాబు ఎలా రియాక్టవుతారో వేచి చూడాల్సిందే మరి.