అదితి రావు హైదరీ.. హిందీ సినిమాలు చూసే తెలుగు ప్రేక్షకులకు పరిచయం అక్కర్లేని పేరు. గ‌తేడాది మణిరత్నం దర్శకత్వంలో రూపొందిన త‌మిళ అనువాద చిత్రం చెలియా`తో.. ఇక్క‌డివారికి మ‌రింత ద‌గ్గ‌ర‌య్యింది ఈ హైద‌రాబాదీ ముద్దుగుమ్మ‌. ఆ సినిమా ఎలా వున్నా...అదితి లుక్స్‌కి ఫిదా అయిపోయారు తెలుగు, తమిళ ప్రేక్షకులు. ఇప్పటికే మలయాళం, తమిళంలో నటించిన ఈ భామ.. ప్ర‌స్తుతం సుధీర్ బాబుకి జోడీగా ఓ తెలుగు సినిమా చేస్తోంది.

అంతేగాకుండా, వెంకటేష్, తేజ కాంబినేషన్‌లో తెరకెక్కుతున్న మూవీలో కూడా ఈ అమ్మడు నటించబోతున్నట్టు ఆ మ‌ధ్య మీడియాలో వార్తలు వినిపించాయి. కొన్ని కార‌ణాల వ‌ల్ల అదితి ఇప్పుడా సినిమా చేయ‌ట్లేద‌ని తెలిసింది. ఇదిలా వుంటే...ప్రస్తుతం హిందీలో దాస్ దేవ్` మూవీలో నటిస్తున్న అదితి...ఈ మూవీ ప్రమోషన్‌లో భాగంగా ఒక ఆసక్తికరమైన విషయాన్ని బయటపెట్టింది.

మణిరత్నం తమిళంలో రూపొందిస్తున్న ఒక కుటుంబకథా చిత్రంలో శింబు సరసన హీరోయిన్‌గా నటించబోతున్నట్టు తెలిపింది. మల్టీస్టారర్ మూవీగా తెర‌కెక్కుతున్న ఈ సినిమాలో విజయ్ సేతుపతి, ఫహాద్ ఫాజిల్, అరవింద్ స్వామి, జయసుధ, ప్రకాష్ రాజ్ ముఖ్య పాత్ర‌ల్లో నటిస్తున్నారు. మద్రాస్ టాకీస్, లైకా ప్రొడక్షన్స్ సంయుక్తంగా నిర్మిస్తున్న ఈ చిత్రానికి ఆస్కార్ అవార్డు గ్రహీత ఎ.ఆర్.రెహమాన్ సంగీతాన్ని అందిస్తున్నారు. కాగా, ఇటీవల విడుదలైన పద్మావత్` మూవీలో మెహరున్నిసా పాత్రలో అదితి నటించిన విషయం తెలిసిందే.