ఎన్టీఆర్ బయోపిక్‌లో శర్వానంద్
- IndiaGlitz, [Monday,May 21 2018]
మహానటుడు నంద‌మూరి తార‌క రామారావు బయోపిక్‌గా తెర‌కెక్కుతున్న 'య‌న్‌.టి.ఆర్' చిత్రాన్ని ఆయన తనయుడు నంద‌మూరి బాలకృష్ణ ప్రధాన పాత్రలో నటిస్తూ.. నిర్మిస్తున్న సంగతి తెలిసిందే. ఈ సినిమా దర్శకత్వ బాధ్యతల నుంచి దర్శకుడు తేజ తప్పుకోవడంతో.. ఇప్పుడు ఆ స్థానాన్ని క్రిష్ భర్తీ చేసే అవకాశాలు కనిపిస్తున్నాయి. ఈ ఏడాది దసరా తర్వాత నిరవధికంగా చిత్రీకరణను ప్రారంభించి వచ్చే ఏడాది (2019) వేసవికి సినిమాని ప్రేక్షకుల ముందుకు తీసుకురావడానికి సన్నాహాలు చేస్తున్నారు.
ఇదిలా ఉంటే.. ఈ సినిమాలో నారా చంద్రబాబు నాయుడు పాత్రలో దగ్గుబాటి రానా కనిపించనున్న విషయం తెలిసిందే. ఇక బసవతారకం పాత్రలో విద్యాబాలన్ నటించనున్నారు. కాగా.. యవ్వన దశలో ఉన్న‌ప్ప‌టి ఎన్టీఆర్‌గా ఎవరిని ఎంపిక చేయాల‌నే సందిగ్ధంలో ఉన్న చిత్ర యూనిట్‌కి.. ఆ పాత్రలో నటించే నటుడు కూడా దొరికేసాడ‌ని స‌మాచారం. తాజా స‌మాచారం ప్ర‌కారం.. ఆ పాత్ర కోసం యంగ్ హీరో శర్వానంద్‌ని ఎంపిక చేసారు. తాజాగా శర్వాకి కథ చెప్పడం.. దానికి అతను ఓకే చెప్పడం చకచకా జరిగిపోయాయ‌ట. దీంతో శర్వా ఎంట్రీ దాదాపుగా ఖాయ‌మైన‌ట్టేన‌ని వినిపిస్తోంది. ఇంత‌కుముందు కూడా శర్వానంద్ ఇందులో న‌టిస్తున్నాడ‌నే వార్త‌లు వ‌చ్చాయి. దీనిపై చిత్ర బృందం స్పందించలేదు. క‌న్‌ఫ‌ర్మ్ అయిన నేప‌థ్యంలో అయినా అధికారిక వార్త వ‌స్తుందేమో చూడాలి.