భీమ్లా నాయక్ ఎఫెక్ట్: శర్వానంద్ ‘‘ఆడవాళ్లు మీకు జోహార్లు’’ వాయిదా.. గనికి కూడా తప్పదా..?
- IndiaGlitz, [Sunday,February 20 2022]
శర్వానంద్, రష్మిక జంటగా తిరుమల కిషోర్‌ తెరకెక్కిస్తున్న చిత్రం ‘ఆడవాళ్లు మీకు జోహార్లు’ విడుదల వాయిదాపడింది. ఇప్పటికే చిత్రీకరణ పూర్తి చేసుకున్న ఈ సినిమాను ఫిబ్రవరి 25న ప్రేక్షకుల ముందుకు తీసుకురావాలని మేకర్స్ భావించారు. కానీ, అనివార్య కారణాల వల్ల రిలీజ్‌ను మార్చి 4వ తేదీకి వాయిదా వేశారు. ఈ సినిమాలో ఖుష్బూ, రాధిక శరత్‌ కుమార్‌, ఊర్వశి వంటి సీనియర్ హీరోయిన్లు కీలక పాత్రలు పోషిస్తున్నారు. శ్రీలక్ష్మీ వెంకటేశ్వర సినిమాస్ పతాకంపై సుధాకర్‌ చెరుకూరి నిర్మిస్తున్న ఈ సినిమాకు దేవిశ్రీ ప్రసాద్‌ స్వరాలందిస్తున్నారు.
మంచి కథతో తెరకెక్కుతోన్న కుటుంబ కథా చిత్రమిది. ఇందులో మహిళలకు ఎంతో ప్రాధాన్యముందని.. శర్వా, రష్మికల జంట ఆకట్టుకుంటుందని చిత్ర యూనిట్ అభిప్రాయపడింది. ఒక్క పాట మినహా చిత్రీకరణ మొత్తం ఇప్పటికే పూర్తయిందని... ప్రస్తుతం పోస్ట్ ప్రొడక్షన్ పనులు జరుగుతున్నట్లు మేకర్స్ శనివారం ఒక ప్రకటనలో తెలిపారు. అయితే ఫిబ్రవరి 25న పవర్‌స్టార్ పవన్ కళ్యాణ్ నటించిన భీమ్లా నాయక్ రిలీజ్ కానుండటంతోనే ఆడవాళ్లు మీకు జోహార్లు వాయిదాపడినట్లుగా గుసగుసలు వినిపిస్తున్నాయి.
మరోవైపు మెగాప్రిన్స్ వరుణ్ తేజ్ హీరోగా కిర‌ణ్ కొర్ర‌పాటి దర్శకత్వంలో ‘గని’ సినిమా కూడా ఫిబ్రవరి 25న రిలీజ్ చేస్తామని నిర్మాతలు ప్రకటించారు. అయితే ఈ సినిమాకు కూడా భీమ్లా నాయక్ ఎఫెక్ట్ పడే అవకాశం పడుతుందేనని గుసగుసలు వినిపిస్తున్నాయి. బాక్సింగ్ నేపథ్యంలో స్పోర్ట్స్ డ్రామాగా తెరకెక్కుతున్న ఈ మూవీలో వరుణ్ తేజ్ బాక్సర్‌గా కనిపించనున్నారు. సయీ మంజ్రేకర్ హీరోయిన్‌గా న‌టిస్తోంది. అల్లు అరవింద్ సమర్పకుడిగా.. అల్లు బాబీ కంపెనీ, రినైస్సన్స్ పిక్చర్స్ పతాకాల‌పై ‘‘గని’’ని సిద్ధు ముద్ద, అల్లు బాబీలు సంయుక్తంగా నిర్మిస్తున్నారు. ఇప్పటికే ఈ మూవీ నుండి విడుదల అయిన ప్రచార చిత్రాలు, వీడియోలు, పాటలు ప్రేక్షకులను ఆకట్టుకుంటున్నాయి. గతేడాది ప్రేక్షకుల ముందుకు రావాల్సిన గని.. కోవిడ్, లాక్‌డౌన్ తదితర కారణాలతో వాయిదా పడుతూ వచ్చింది.