యూట్యూబ్ ఫేమ్ షణ్ముఖ్ జశ్వంత్ ఫుల్లుగా మద్యం సేవించి అడ్డంగా బుక్ అయ్యాడు. షణ్ణు మద్యం తాగి కారు నడిపుతూ వేగంగా వెళ్లి మూడు వాహనాలను ఢీకొట్టాడు. ఈ ఘటనలో ఓ ద్విచక్ర వాహనదారుడు తీవ్రంగా గాయపడ్డాడు. హైదరాబాద్‌లోని జూబ్లీహిల్స్ పోలీస్‌స్టేషన్ పరిధిలోని జర్నలిస్ట్ కాలనీ హుడా హైట్స్ వద్ద ఈ రోడ్డు ప్రమాదం జరిగింది. వెంటనే స్థానికులు పోలీసులకు సమాచారం అందించారు. దీంతో పోలీసులు ఘటనా స్థలానికి చేరుకుని షణ్ముఖ్‌ని అదుపులోకి తీసుకున్నారు.

షణ్ముఖ్ మద్యం మత్తులో కారు నడిపినట్టు తేలింది. బ్రీత్ ఎనలైజర్‌తో పరీక్షించగా.. 170 రీడింగ్ చూపించనట్టు పోలీసులు వెల్లడించారు. షణ్ముఖ్‌తో పాటు కారులో అతని మిత్రుడు కూడా ఉన్నట్టు గుర్తించారు. దీంతో పోలీసులు షణ్ముఖ్‌తో పాటు అతడి స్నేహితుడిని సైతం అదుపులోకి తీసుకున్నారు. పోలీసులు కేసు నమోదు చేసి దర్యాప్తు నిర్వహిస్తున్నారు. ఇప్పుడిప్పుడే షణ్ముఖ్ కెరీర్ పరంగా ఎదుగుతున్నాడు. బిగ్‌బాస్ సీజన్ 5లో అతని పేరు ప్రముఖంగా వినిపిస్తోంది. పలు ఛానళ్లలో కొన్ని షోస్‌లో కూడా ఇటీవలి కాలంలో కనిపిస్తున్నాడు. ఈ సమయంలో ఇలా మద్యం సేవించి బుక్ అవడమంటే ఇది అతని కెరీర్‌కు కూడా ఇబ్బందికరంగా మారుతుందని పలువురు భావిస్తున్నారు.