பிக்பாஸ் குடும்பத்தில் பங்கேற்கும் பங்கேற்பாளர்களில் ஒருவரை வாரம் ஒருமுறை தலைவராக்கும் விதி கடைபிடிக்கப்பட்டு வருகிறது. சினேகன், காயத்ரி, கணேஷ் வெங்கட்ராமன் ஆகியோர் இதுவரை தலைவராக பணிபுரிந்திருக்கும் நிலையில் நேற்று புதிய தலைவர் தேர்வு நடைபெற்றது.

தலைவர் தேர்வில் ஓவியா, நமீதா, மற்றும் சக்தி ஆகியோர் பங்கேற்றனர். தலைவரை தேர்வு செய்ய ஒரு புதிய போட்டி இம்மூவருக்கும் நடத்தப்பட்டது. இரண்டு கைகளிலும் தண்ணீர் கப்புகள் கொடுக்கப்பட்டு பாதி உட்கார்ந்த நிலையில் இருக்க வேண்டும். யார் அதிக நேரம் இருக்கின்றார்களோ அவர் தான் தலைவர் என்று கூறப்பட்டது.

ஓவியா சிறிது நேரத்திலேயே தண்ணீரை கொட்டிவிட்டு போட்டியில் இருந்து வெளியேற, நமீதாவுக்கும் சக்திக்கும் போட்டி கடுமையானது. இறுதியில் நமீதாவும் போட்டியில் இருந்து வெளியேற சக்தி புதிய தலைவராக தேர்வு செய்யப்பட்டார்.

போட்டியின்போது தலைவர் கணேஷ், தன்னை ஊக்குவிக்கவில்லை என்றும் சக்தியை மட்டும் ஊக்குவித்ததாகவும் நமீதா தரப்பில் இருந்து புகார் செய்யப்பட்டது என்பது குறிப்பிடத்தக்கது.