‘బాహుబలి’ తర్వాత రెబల్ స్టార్ ప్రభాస్ మరో భారీ సినిమా 'సాహో' తో ప్రేక్షకుల ముందుకు రాబోతున్నారు. ఈ చిత్రానికి సుజిత్ దర్శకత్వం వహిస్తుండగా యు.వి క్రియేషన్స్ సంస్థ దాదాపు రూ. 300 కోట్ల బడ్జెట్‌తో దీన్ని తెరకెక్కిస్తోంది. పోస్టర్లు, షెడ్స్‌ ఆఫ్ సాహోతో ఇప్పటికే సినిమా అంచనాలు భారీగా పెంచేసింది. ప్రభాస్ పుట్టినరోజు సందర్భంగా విడుదల చేసిన షెడ్స్‌ ఆఫ్ సాహో మొదటి ఛాప్టర్‌కు విశేష స్పందన వచ్చిన విషయం విదితమే.

ఈ రోజు శ్ర‌ద్ధా క‌పూర్ బ‌ర్త్ డే సంద‌ర్భంగా సాహో చిత్ర బృందం ‘షేడ్స్ ఆఫ్ సాహో- చాప్ట‌ర్- 2’ పేరుతో మేకింగ్ వీడియో రిలీజ్ చేశారు. నిమిషం నిడివితో ఉన్న ఈ మేకింగ్ వీడియో హాలీవుడ్ స్థాయిలో రోమాలు నిక్కబొడుచుకునేలా ఉందని చెప్పడంలో ఎలాంటి అతిశయోక్తి లేదేమో. స్టైలిష్ లుక్‌లో ప్రభాస్ అదరగొట్టేశారు. హీరోయిన్ శ్రద్ధా కపూర్‌ గ్లామర్ పరంగానే కాకుండా యాక్షన్ ఎపిసోడ్‌‌లో భాగమైనట్లు మేకింగ్ వీడియో‌ ద్వారా తెలుస్తోంది. బాలీవుడ్ బ్యూటీ శ్ర‌ద్ధా ప్ర‌స్తుతం తెలుగుతో పాటు, బాలీవుడ్‌లో ప‌లు సినిమాల‌తో బిజీబిజీగా గడుపుతోంది. సాహో చిత్రంతో ఈ అమ్మ‌డి తెలుగు తెర‌కి ప‌రిచ‌యమవుతోంది.

వీడియోపై విశ్లేషణ:-

ప్ర‌భాస్, శ్ర‌ద్ధా లుక్స్ ఆక‌ట్టుకునేలా ఉన్నాయి. యంగ్ రెబల్ స్టార్ ప్రభాస్ ‘బాహుబలి’ చిత్రంతో ఖండాంతరాలు దాటిన ఆయన క్రేజ్.. ‘సాహో’ మేకింగ్ వీడియోలతో రెట్టింపయ్యేలా ఉంది. ప్రభాస్ యాక్షన్ సీన్లలో డూప్ లేకుండా పెద్ద సాహసమే చేశారని చెప్పుకోవచ్చు. శ్రద్ధా ఈ సినిమాలో శ్రద్ధా పోలీస్ ఆఫీసర్ పాత్రలో కనిపించే అవకాశం ఉన్నట్లు వీడియోను బట్టి చూస్తే తెలుస్తోంది. చివర్లో ప్రభాస్ మరో న్యూ లుక్‌లో కనిపించి ‘బూమ్’ అంటూ డైలాగ్ చెప్పడం అదుర్స్ అనిపించింది. మొత్తానికి చూస్తే.. ప్రభాస్ ఇమేజ్‌ను తగ్గట్లుగా హై టెక్నికల్ వాల్యూస్‌తో ఈ చిత్రాన్నిరూపొందిస్తున్నారు. ఒక్క మాటలో చెప్పాలంటే ‘సాహో రెండో ఛాప్టర్’ సినిమాపై మరింత అంచనాలు పెంచేసిందనే చెప్పవచ్చు. ఈ వీడియోపై అటు శ్రద్ధ.. ఇటు ప్రభాస్ అభిమానులు పెద్ద ఎత్తున స్పందిస్తుండగా.. పలువురు నటీనటులు సైతం కామెంట్స్ చేస్తున్నారు. ఇప్పటికే ఈ వీడియో 330,785 వ్యూస్‌ సొంతం చేసుకుంది.

తెలుగు, తమిళ, హిందీ భాషల్లో తెరకెక్కుతున్న ఈ చిత్రంలో మందిరా బేడి, జాకీ ష్రాఫ్, నీల్ నితిన్ ముకేష్ తదితరులు బాలీవుడ్ దిగ్గజాలు నటించారు. స్వాతంత్ర్య దినోత్సవ కానుకగా ఈ సినిమా ఆగస్ట్ 15న థియేటర్లలోకి రానుంది.