ஒவ்வொரு வாரமும் குறைந்தது நான்கு திரைப்படங்கள் வெளியாகிக் கொண்டிருக்கும் நிலையில் செப்டம்பர் 23ஆம் தேதி 7 திரைப்படங்கள் வெளியாக உள்ளதாக தகவல் வெளியாகி உள்ளன.

செப்டம்பர் 30ஆம் தேதி மணிரத்னம் இயக்கிய ’பொன்னியின் செல்வன்’ வெளியாக உள்ளது. அதற்கு முந்தைய நாள் அதாவது செப்டம்பர் 29ஆம் தேதி தனுஷ் நடித்த ’நானே வருவேன்’ வெளியாகும் என்று எதிர்பார்க்கப்படுகிறது

இந்த நிலையில் இந்த வாரம் வெள்ளிக்கிழமை அதாவது செப்டம்பர் 23ஆம் தேதி 7 திரைப்படங்கள் வெளியாக உள்ளது என்பதும் அனைத்துமே சின்ன பட்ஜெட் படங்கள் என்பது குறிப்பிடத்தக்கது. இந்த படங்கள் குறித்து தற்போது பார்ப்போம்.

’ஆதார்’: கருணாஸ் முக்கிய வேடத்தில் நடித்திருக்கும் இந்த படத்தில் அருண்பாண்டியன், மனிஷா யாதவ், ரித்விகா உள்ளிட்ட பலர் நடிக்கின்றனர். ஸ்ரீகாந்த் தேவா இசையில், மனோ நாராயணன் ஒளிப்பதிவில், ஜான் பிரிட்டோ படத்தொகுப்பில் உருவாகியுள்ளது. இந்த படத்தின் டிரைலர் சமீபத்தில் வெளியாகி நல்ல வரவேற்பை பெற்றது.

’பபூன்’: கார்த்திக் சுப்புராஜ் தயாரிப்பில் இயக்குனர் அசோக் வீரப்பன் என்பவர் இயக்கிய இந்த படத்தின் முக்கிய வேடத்தில் வைபவ் நடித்துள்ளார். சந்தோஷ் நாராயணன் இசையில் உருவாகியுள்ள இந்த படத்திற்கு தினேஷ் புருஷோத்தமன் என்பவர் ஒளிப்பதிவும், குமார் தங்கப்பன் என்பவர் கலை இயக்கமும், வெற்றி கிருஷ்ணன் என்பவர் படத்தொகுப்பு பணியும் செய்துள்ளனர். இந்த படத்திற்கு ஓரளவு எதிர்பார்ப்பு உள்ளது.

’ரெண்டகம்’: அரவிந்த்சாமி நடிப்பில் ஃபெல்லினி என்பவரது இயக்கத்தில் உருவாகியுள்ள ‘ரெண்டகம்’ திரைப்படத்தில் குஞ்சாக்கோ போபன், ஜாக்கி ஷெராப் உள்பட பலர் நடித்துள்ளனர். கௌதம் சங்கர் ஒளிப்பதிவில், அப்பு என். பட்டதாரி படத்தொகுப்பில் அருள்ராஜ் கென்னடி இசையில் உருவாகிய இந்த படம் அரவிந்த்சாமியின் வெற்றி படங்களில் ஒன்றாக இருக்கும் என எதிர்பார்க்கப்படுகிறது.

’ட்ரிக’ர்: அதர்வா, தன்யா ரவிச்சந்திரன் நடித்துள்ள இந்த திரைப்படத்தில் அருண்பாண்டியன் முக்கிய வேடத்தில் நடித்துள்ளார். திலிப் சுப்பராயனின் ஸ்டண்ட் காட்சிகள் இந்த படத்தின் ஹைலைட்டாக இருக்கும் என எதிர்பார்க்கப்படுகிறது. ஜிவி பிரகாஷ் நடித்த ’டார்லிங்’ உட்பட ஒரு சில திரைப்படங்களை இயக்கிய இயக்குனர் சாம் ஆண்டன் இயக்கத்தில் உருவாகியுள்ள இந்த படத்திற்கு ஜிப்ரான் இசையமைத்துள்ளார். இந்த படத்திற்கு ’இரும்புத்திரை’ இயக்குனர் பிஎஸ் மித்ரன் வசனம் எழுதி இருக்கிறார் என்பதும், இந்த படமும் ஓரளவு எதிர்பார்ப்பை ஏற்படுத்தியுள்ளது என்பதும் குறிப்பிடத்தக்கது.

மேற்கண்ட நான்கு திரைப்படங்கள் தவிர ’ட்ராமா’, ’கெத்துல’, ’குழலி’ ஆகிய திரைப்படங்களும் செப்டம்பர் 23ஆம் தேதி வெளியாக உள்ளதாக அறிவிக்கப்பட்டுள்ளது.