టాలీవుడ్‌ ఇండస్ట్రీని వరుస విషాదాలు వెంటాడుతున్నాయి. ఇటీవలే ప్రముఖ నిర్మాత కోనేరు అనిల్ కుమార్ తుదిశ్వాస విడిచిన విషయం తెలిసిందే. ఒక్క రోజు గ్యాప్‌లోనే మరో సీనియర్ ఆర్టిస్ట్ సుబాష్ చంద్రబాబోస్ (బోస్) కన్నుమూశారు.

గత కొన్ని రోజులుగా తీవ్ర అనారోగ్యంతో బాధపడుతున్న బోస్.. ఆస్పత్రిలో చికిత్స పొందుతున్నారు. నగరంలోని గాంధీ ఆస్పత్రిలో చికిత్స పొందుతూ ఆదివారం మధ్యాహ్నం తుదిశ్వాస విడిచారు. దీంతో కుటుంబ సభ్యులు, బంధవులు విషాదం మునిగిపోయారు. బోస్ మృతిపట్ల పలువురు సినీ ప్రముఖులు సంతాపం వ్యక్తం చేశారు.

బోస్‌కు ఏమైంది..?

వారం రోజుల క్రితం ప్రమాదవశాత్తు ఇంట్లో కాలు జారి బోస్ కిందపడ్డాడు. ఈ ఘటనలో బోస్ తలకు గాయమై బ్రెయిన్‌లో రక్తం గడ్డకట్టింది. బోస్‌కు బీపీ ఉన్నట్లు తెలుస్తోంది.. మందులు వాడుతున్న ఆయన గత కొద్దిరోజులుగా మానేయడంతో కళ్లు తిరిగి కిందపడినట్లు సమాచారం. దీంతో హుటాహుటిన కుటుంబ సభ్యులు నగరంలోని గాంధీ ఆస్పత్రికి తరలించి వైద్యం అందించారు. ఆయన ఆస్పత్రి ఐసీయూ వార్డులో చికిత్స పొందుతున్నప్పుడు పలువురు సినీ, సీరియల్, రంగస్థల నటులు వచ్చి ఆయన్ను పరామర్శించారు. వారం రోజులుగా ఆస్పత్రిలో చికిత్స పొందుతున్న ఆయన ఆదివారం మధ్యాహ్నం కన్నుమూశారు.

బోస్ నటించిన సినిమాలు..

‘సాహసపుత్రుడు’, ‘ప్రేమ ఖైదీ’, ‘నిన్నే పెళ్లాడుతా’, ‘ఇడియట్’, ‘అల్లరి రాముడు’, ‘ప్రేమించి చూడు’ ‘విధి’ సినిమాతో పాటు పలు తెలుగు సీరియల్స్‌లో ఆయన నటించారు. కాగా ఎక్కువగా పూరీ జగన్నాథ్, కృష్ణవంశీ తెరకెక్కించే సినిమాల్లో ఎక్కువగా ఈయన కనిపించే వారు. సుమన్‌ హీరోగా తెరకెక్కిన సాహసపుత్రుడు చిత్రంతో బోస్ టాలీవుడ్‌కు పరిచయం అయ్యారు. ఇలా ఇరవై ఏళ్లుగా సినీ ఇండస్ట్రీలో పలుపాత్రల్లో నటించి మెప్పించారు.