చెవిలో పువ్వు సినిమాతో ద‌ర్శ‌కుడిగా ప‌రిచ‌య‌మై...ప్రేమ ఖైదీ చిత్రంతో తొలి విజ‌యాన్ని సాధించి ఆత‌ర్వాత ఎన్నో విజ‌య‌వంత‌మైన చిత్రాల‌ను అందించారు స్వ‌ర్గీయ ఇ.వి.వి స‌త్యానారాయ‌ణ‌. మెగాస్టార్ చిరంజీవి, యువ‌ర‌త్న బాల‌కృష్ణ‌, యువస‌మ్రాట్ నాగార్జున‌, విక్ట‌రీ వెంక‌టేష్...ఈ టాప్ స్టార్స్ న‌లుగురితో విజ‌య‌వంత‌మైన చిత్రాలు అందించారాయ‌న‌.

ఈరోజు ఇ.వి.వి జ‌యంతి. ఈ సంద‌ర్భంగా ఈలోకం మీరు లేర‌న్న‌ది ఓ అబ‌ద్ద‌మ‌నుకుంటూ...మీరు పంచిన నువ్వుల్లో మిమ్మ‌ల్ని వెతుక్కుంటూ...మీ స్మృతిలే మా ఊపిరిగా..మీ ఆలోచ‌న‌లే ఆశీస్సులుగా...ప్ర‌తి క్ష‌ణం మాతోడు మీరుగా సాగిపోతున్నాం...ఇప్ప‌టికీ మీరే మా శ్వాస అంటున్నాం..అంటూ ఇ.వి.వి కుటుంబ స‌భ్యులు త‌మ స్పంద‌న తెలియ‌చేసారు. అలాగే ఇ.వి.వి జ‌యంతి సంద‌ర్భంగా అల్ల‌రి న‌రేష్ తాజా చిత్రం సెల్ఫీ రాజా ఫ‌స్ట్ లుక్ రిలీజ్ చేసారు.

ఈ సంద‌ర్భంగా ట్విట్ట‌ర్ లో అల్ల‌రి న‌రేష్ స్పందిస్తూ...సెల్ఫీ రాజా ఫ‌స్ట్ లుక్ రిలీజ్ చేయ‌డానికి నాన్న‌ జ‌యంతి క‌న్నా మంచి రోజు ఏముంటుంది. మిస్ యు నాన్న అంటూ సెల్ఫీ రాజా ఫ‌స్ట్ లుక్ పోస్ట్ చేసారు. తండ్రి జ‌యంతి రోజు ఫ‌స్ట్ లుక్ రిలీజ్ చేసిన సెల్ఫీ రాజా స‌క్సెస్ సాధిస్తాడ‌ని ఆశిద్దాం.