‘సీటీమార్’ టీజర్ రివ్యూ.. అంతా బాగుంది కానీ..
- IndiaGlitz, [Monday,February 22 2021]
సంపత్ నంది దర్శకత్వంలో గోపీచంద్, మిల్కీ బ్యూటీ తమన్నా హీరోహీరోయిన్లుగా రూపొందుతున్న చిత్రం ‘సీటీమార్’. స్పోర్ట్స్ డ్రామాగా ఈ చిత్రం తెరకెక్కుతోంది. గోపీచంద్, తమన్నా కబడ్డీ కోచ్‌లుగా నటిస్తున్నారు. గోపిచంద్ చాలా గ్యాప్ తీసుకుని చేస్తున్న సినిమా కావడంతో పాటు స్పోర్ట్స్ డ్రామా కావడంతో సినిమాపై అంచనాలు భారీగానే ఉన్నాయి. తాజాగా ఈ సినిమాకు సంబంధించిన టీజర్‌ను చిత్ర యూనిట్ విడుదల చేసింది.
'మైదానంలో ఆడితే ఆట.. బయట ఆడితే వేట' అంటూ గోపించంద్ చెప్పే డైలాగ్స్ ఆకట్టుకుంటున్నాయి. స్పోర్ట్స్ డ్రామానే అయినప్పటికీ గోపీచంద్ తరహా యాక్షన్ కూడా ఇందులో ఉన్నట్టు టీజర్ ద్వారా అర్థమవుతోంది. కోచ్‌గా ఆటాడిస్తూనే.. ప్రత్యర్థులను కూడా ఓ ఆట ఆడుకున్నట్టు తెలుస్తోంది. మణిశర్మ అందించిన సంగీతం హైలెట్‌గా నిలిచింది. ప్రస్తుతం పోస్ట్ ప్రొడక్షన్ దశలో ఉన్న ఈ చిత్రం ఏప్రిల 2న విడుదలవుతోంది. ఈ సినిమాను సిల్వర్‌ స్క్రీన్‌ పతాకంపై శ్రీనివాస చిట్టూరి నిర్మిస్తున్నారు.
అంతా బాగుంది కానీ.. అయితే ఒక డైలాగ్ విషయంలో మాత్రం గోపిచంద్.. యంగ్ టైగర్ ఎన్టీఆర్‌ను కాపీ కొట్టారని విమర్శలు వెల్లువెత్తుతున్నాయి. ఓ సినిమాలో ఎన్టీఆర్.. ‘ఎవడుపడితే వాడు బుడ్డోడు బుడ్డోడు అంటే గుడ్డలూడతీసి కొడతా.. అలా పిలవాలంటే ఓ అర్హత ఉండాలి లేదంటే నా అభిమాని అయి ఉండాలి’ అంటాడు. ఈ సినిమాలో గోపిచంద్.. ‘నన్ను అలా పిలవాలంటే ఒకటి నా ఇంట్లో వాళ్లు పిలవాలి లేదంటే నా పక్కనున్న ఫ్రెండ్స్ పిలవాలి’ అంటూ చెప్పే డైలాగే సేమ్ టు సేమ్ ఎన్టీఆర్ డైలాగ్ లాగే ఉందని నెటిజన్లు కామెంట్స్ చేస్తున్నారు.