சமீபத்தில் ஆண்டாள் குறித்து கவிஞர் வைரமுத்து கூறிய கருத்து பெரும் பரபரப்பை ஏற்படுத்தியுள்ள நிலையில் வைரமுத்துக்கு ஆதரவாகவும், எதிர்ப்பாகவும் பலர் பலவிதமான கருத்துக்களை கூறி வருகின்றனர். வைரமுத்து வருத்தம் தெரிவித்த பின்னரும் இந்த பிரச்சனையை நீட்டிப்பது சரியில்லை என்பதே பலரது கருத்தாக உள்ளது. இந்த நிலையில் இதுகுறித்து பிரபல இயக்குனர் சீனுராமசாமி தனது சமூக வலைத்தளத்தில் கூறியுள்ளதாவது:

இந்து மத பெண் துறவிகள் என்பதுதான் தேவதாசி என்பதற்கான உண்மையான பொருள்.

தேவதாசி என்ற சொல் தவறாக புரிந்து கொள்ளப்பட்டிருக்கும் இக்கால கட்டத்தில் அதை கவிஞர் வைரமுத்து மேற்கோளாக கூட காட்டி இருக்க வேண்டியது இல்லை.

நான் பள்ளிப் பருவத்தில் கோவில்களில் மார்கழி அதிகாலையில் தேவாரம், திருப்பாவை,  திருவம்பாவை வகுப்புகளில் மாணவனாக பாடி இருக்கிறேன்

நான் அறிந்த வரை கவிஞர் வைரமுத்துவை தாக்குபவர்களை விட கோதை ஆண்டாளையும், அவரது தமிழையும் ஏனைய பக்தி இலக்கியங்களில் உள்ள தமிழ்ச்சுவையும் அதிகம் நேசிப்பவர் அவர். அதற்கு உதாரணம் கம்பனில் தொடங்கி தொடர்ந்து அவர் செய்து வரும் பக்தி இலக்கிய கட்டுரைகள்.

இவ்வாறு சீனுராமசாமி கூறியுள்ளார்.