கடந்த சில நாட்களாகவே சீமான் குறித்து வைகோ திடுக்கிடும் புகார்களை கூறி வருகிறார். பிரபாகரனை வெறும் ஐந்து நிமிடம் மட்டுமே சீமான் பார்த்ததாகவும், பிரபாகரனுடன் அவர் போட்டோ எடுக்கவில்லை என்றும், பிரபாகனுடன் சீமான் இருக்கும் போட்டோ போட்டோஷாப் என்'றும் சமீபத்தில்  வைகோ கூறியது அனைவரையும் அதிர வைத்தது. ஒரு சின்ன விசயத்திற்கு கூட மணிக்கணக்கில் விளக்கம் அளிக்கும் சீமான், இன்றுவரை வைகோவின் இந்த குற்றச்சாட்டுக்கு பதிலளிக்கவில்லை என்பது குறிப்பிடத்தக்கது.

இந்த நிலையில் தற்போது மீண்டும் சீமான் மீது வைகோ கடுமையான புகார்களை கூறியுள்ளார். பொய் சொல்வதில் சீமானைப்போல்  பொய் சொல்பவரை என் வாழ்நாளில் கண்டதே இல்லை என்று அவர் கூறியுள்ளார். பொய் சொல்வதில் கோயபல்ஸ் தான் உலகிலேயே சிறந்தவர் என்றும் ஆனால் அவரையே சீமான் மிஞ்சிவிட்டதாகவும் கூறியுள்ளார்.

ஒருசில இளைஞர்கள் சீமானின் ஆவேசமான பேச்சை நம்புகிறார்கள் என்றும் அவர்களுக்காக தான் வருத்தப்படுவதாக கூறிய வைகோ, 'சீமான், ஈழத்தை சொல்லி, பிரபாகரன் பெயரை சொல்லி பணம் வசூல் செய்து கொண்டிருக்கும் சர்வதேச மோசடியை என்னால் காண சகிக்கவில்லை' என்று கூறியுள்ளார்.