உலகநாயகன் கமல்ஹாசன் வசிக்கும் ஈசிஆர் இல்லத்திற்கு திடீரென போலீஸ் பாதுகாப்பு அளிக்கப்பட்டுள்ளதாக வெளிவந்த தகவல் பரபரப்பை ஏற்படுத்தியுள்ளது.

உலகநாயகன் கமல்ஹாசனின் ராஜ்கமல் இன்டர்நேஷனல் பிலிம்ஸ் நிறுவனத்தின் தயாரிப்பில் உருவான ’அமரன்’ திரைப்படத்தில் சிவகார்த்திகேயன், சாய் பல்லவி உட்பட பலர் நடித்திருந்தனர். இந்த படம் தீபாவளி அன்று திரைக்கு வந்து மிகப்பெரிய வெற்றி பெற்றது என்பதுடன், இதன் வசூல் 200 கோடி ரூபாயை நெருங்கிக் கொண்டிருப்பதாக கூறப்படுகிறது.

தமிழக முதல்வர் மு.க. ஸ்டாலின் உள்பட பல அரசியல்வாதிகள், சூப்பர் ஸ்டார் ரஜினிகாந்த் உட்பட பல திரையுலக பிரபலங்கள் இந்த படத்தை பாராட்டியுள்ளனர். அதேவேளை, இத்திரைப்படத்திற்கு திடீரென இஸ்லாமிய அமைப்புகள் எதிர்ப்பு தெரிவித்துள்ளன. இஸ்லாமியர்களை தீவிரவாதிகளாக காட்சிப்படுத்தி இருப்பதாக அவை கண்டனம் தெரிவித்து வருகின்றன. இதனையடுத்து, சென்னையில் ’அமரன்’ திரைப்படம் திரையிடப்பட்டுள்ள திரையரங்குகளுக்கு போலீஸ் பாதுகாப்பு வழங்கப்பட்டுள்ளது.

திரையரங்குகளை முற்றுகையிட போவதாக இஸ்லாமிய அமைப்புகள் அறிவித்த நிலையில், திரையரங்குகளுக்கு மட்டும் அல்லாமல் படத்தின் தயாரிப்பாளரான கமல்ஹாசனின் ஈசிஆர் இல்லத்திற்கும் போலீஸ் பாதுகாப்பு வழங்கப்பட்டுள்ளதாக தகவல் வெளியாகியுள்ளது.