ప‌వ‌ర్‌స్టార్ ప‌వ‌న్‌క‌ల్యాణ్ పుట్టిన రోజు సందర్భంగా ఇప్పటికే ఆయన అభిమానులకు ‘వకీల్ సాబ్’ మోషన్ పోస్టర్ రూపంలో ఒక గిఫ్ట్ అందింది. తాజాగా మరో సర్‌ప్రైజ్ గిఫ్ట్ కూడా ఇండస్ట్రీ నుంచి వచ్చేసింది. ప‌వ‌న్‌క‌ల్యాణ్ 27వ సినిమా అధికారిక ప్ర‌క‌ట‌న వెలువ‌డింది. మెగా సూర్య ప్రొడ‌క్ష‌న్స్ బ్యాన‌ర్‌పై ఎ.ఎం.ర‌త్నం ఈ చిత్రాన్ని నిర్మిస్తున్నారు. క్రిష్ ద‌ర్శ‌క‌త్వంలో తెరకెక్కనున్న ఈ చిత్రానికి సంబంధించిన షూటింగ్ ఇప్పటికే ప్రారంభమైంది. అయితే క‌రోనా మహమ్మారి కారణంగా ఆగిపోయింది.

ప‌వ‌న్ పుట్టిన‌రోజు సంద‌ర్భంగా ఈ సినిమా ప్రీ లుక్ పోస్ట‌ర్‌ను చిత్ర బృందం విడుద‌ల చేసింది. పీరియాడిక్ డ్రామాగా ఈ చిత్రం తెరకెక్కనుంది. ఈ చిత్రంలో పవన్ పాత్ర ఎలా ఉండబోతోందనేది ప్రీ లుక్ పోస్టర్ ద్వారా చూపించే ప్రయత్నం చేశారు. ఈ చిత్రానికి ఎం.ఎం కీరవాణి సంగీతం అందిస్తున్నారు. ‘‘పవన్‌క‌ల్యాణ్‌గారు మీ 27వ చిత్రం పదిహేన్రోజుల షూటింగ్ ప్రతిక్షణం టీం అందరికీ గొప్ప జ్ఞాపకంలా కదులుతుంది. చిరస్థాయిగా నిలిచే విజయం కంటికి కనిపిస్తుంది. ఇందుకు కారణం మీరు, మీ ప్రోత్సాహం, మీ సహృదయం..ఎప్పటికీ ఇలాగే కోట్లాది జనం శుభాకాంక్షలు అందుకుంటుండాలని ఆశిస్తూ.. హ్యాపీ బ‌ర్త్ డే ప‌వ‌న్‌క‌ల్యాణ్‌’’ అని క్రిష్ ట్వీట్ చేశారు.