లోక్‌సభ ఎన్నికల కంటే ముందు మరో కీలకమైన ఎన్నికలకు రంగం సిద్ధమైంది. త్వరలో 15 రాష్ట్రాల్లో ఖాళీ కానున్న 56 మంది రాజ్యసభ సభ్యుల ఎంపికకు కేంద్ర ఎన్నికల సంఘం షెడ్యూల్ విడుదల చేసింది. ఫిబ్రవరి 8న ఎన్నికలకు సంబంధించిన నోటిఫికేషన్ విడుదల కానుండగా.. ఫిబ్రవరి 27న పోలింగ్ జరగనుంది. ఆ రోజు ఉదయం 9 గంటల నుంచి సాయంత్రం 4 గంటల వరకూ పోలింగ్ జరగనుంది. అదే రోజు సాయంత్రం 5 గంటలకు కౌంటింగ్ జరిపి ఫలితాలు ప్రకటిస్తారు.

అత్యధికంగా ఉత్తరప్రదేశ్‌లో 10 మంది.. బిహార్, మహారాష్ట్రలో ఆరుగురు సభ్యులకు ఎన్నిక జరగనుంది. ఇక పశ్చిమబెంగాల్‌లో ఐదుగురు, మధ్యప్రదేశ్‌లో ఐదుగురు, కర్ణాటకలో నలుగురు సభ్యులు.. ఆంధ్రప్రదేశ్, తెలంగాణ, ఒడిశా, రాజస్థాన్‌ రాష్ట్రాల్లో మూడేసి స్థానాలు ఉండగా.. ఛత్తీస్‌గఢ్, హరియాణా, హిమాచల్ ప్రదేశ్, ఉత్తరాఖండ్‌లో ఒక్కో స్థానానికి ఈ ఎన్నికలు జరగనున్నాయి.

ఎన్నికల షెడ్యూల్ ఇదే..

ఫిబ్రవరి 8- ఎన్నికల నోటిఫికేషన్
ఫిబ్రవరి 15- నామినేషన్లకు చివరి తేదీ
ఫిబ్రవరి 16- నామినేషన్ల పరిశీలన
ఫిబ్రవరి 20- నామినేషన్ల ఉపసంహరణకి చివరి తేదీ
ఫిబ్రవరి 27- పోలింగ్

కాగా ఇప్పటికే రాజ్యసభ ఎన్నికలే టార్గెట్‌గా సీఎం జగన్ వ్యూహాలు రచిస్తున్నారు. ప్రస్తుతం రాజ్యసభ సభ్యులుగా వేంరెడ్డి ప్రభాకర్ రెడ్డి, సీఎం రమేశ్, కనకమేడల రవీంద్రకుమార్ ఉన్నారు. ఈ మూడు స్థానాల్లో ఒకటి వైసీపీ సిట్టింగ్ కాగా.. మిగిలిన రెండు టీడీపీ స్థానాలుగా ఉన్నాయి. ఈ నేపథ్యంలో మూడు రాజ్యసభ స్థానాలను దక్కించుకునేందుకు వైసీపీ ఆచితూచి వ్యవహరిస్తోంది. ప్రస్తుతం వైసీపీకి ఉన్న సంఖ్యాబలం పరంగా మూడు స్థానాలూ వైసీపీకే దక్కే అవకాశం ఉంది. దీంతో వైసీపీ అభ్యర్థులుగా వైవీ సుబ్బారెడ్డి, గొల్ల బాబూరావు, జంగాలపల్లి శ్రీనివాస్‌లను ఖరారుచేసింది.

అయితే ప్రస్తుతం చేస్తున్న మార్పులు చేర్పుల కారణంగా అసంతృప్త ఎమ్మెల్యేలు తెలుగుదేశం పార్టీకి మద్దతు తెలిపే అవకాశం ఉంది. ఈ క్రమంలో టీడీపీ ఎమ్మెల్యేల బలాన్ని తగ్గించేందుకు వ్యూహాలు సిద్ధం చేసింది. వైసీపీ నుంచి టీడీపీకి మారిన మేకపాటి చంద్రశేఖర్ రెడ్డి, ఉండవల్లి శ్రీదేవి, కోటంరెడ్డి శ్రీధర్ రెడ్డి, ఆనం రాంనారాయణరెడ్డి.. టీడీపీ నుంచి వైసీపీకి మారిన వల్లభనేని వంశీ, కరణం బలరాం, వాసుపల్లి గణేశ్, మద్దాలి గిరి, జనసేన నుంచి వైసీపీకి వెళ్లిన రాపాక వరప్రసాద్‌లకు ఇప్పటికే స్పీకర్ స్పీకర్ తమ్మినేని సీతారాం నోటీసులు పంపారు. ఈ క్రమంలోనే విశాఖ ఉత్తర నియోజకవర్గ టీడీపీ ఎమ్మెల్యే గంటా శ్రీనివాసరావు రాజీనామాను ఆమోదించారు.

ఇదిలా ఉంటే స్పీకర్ నోటీసులపై వైసీపీ రెబల్ ఎమ్మెల్యేలు ఉండవల్లి శ్రీదేవి, ఆనం రామనారాణరెడ్డి, మేకపాటి చంద్రశేఖర్ రెడ్డి, కోటంరెడ్డి శ్రీధర్ రెడ్డిలు హైకోర్టులో పిటిష‌న్‌ను దాఖ‌లు చేశారు. ఇక తన రాజీనామా ఆమోదంపై గంటా శ్రీనివాసరావు కూడా హైకోర్టును ఆశ్రయించారు. ఈ పిటిషన్‌లపై విచారణ చేపట్టిన న్యాయస్థానం కౌంటర్ దాఖలు చేయాలని స్పీకర్, న్యాయశాఖ కార్యదర్శి, కేంద్ర ఎన్నికల సంఘం, రాష్ట్ర ఎన్నికల ప్రధాన అధికారికి నోటీసులు జారీ చేసింది. అనంతరం త‌దుప‌రి విచార‌ణ‌న‌ను మూడు వారాల‌కు వాయిదా వేసింది.