கே.பாலசந்தர் இயக்கத்தில் பிரபு, ரமேஷ் அரவிந்த், மீனாட்சி சேஷாத்திரி, பிரகாஷ்ராஜ் நடித்த ’டூயட்’ என்ற படம் கடந்த 1994ஆம் ஆண்டு வெளியானது. இந்த படத்தில் பிரபு ஒரு சாக்சோபோன் கலைஞராக நடித்திருப்பார். ஏ.ஆர்.ரஹ்மான் இசையமைத்த இந்த படத்தின் அனைத்து பாடல்களும் சாக்சோபோன் இசையில் உருவாகியிருக்கும். இந்த படத்தில் பாடல்களுக்கு சாக்சோபோன் வாசித்தவர் தான் இந்திய அளவில் பிரபலமான கத்ரி கோபால்நாத். இவர் இன்று காலமானார். இவருக்கு வயது 69.

கடந்த சில நாட்களாக உடல்நலக்குறைவு காரணமாக மங்களூருவில் உள்ள தனியார் மருத்துவமனையில் அனுமதிக்கப்பட்டு சிகிச்சை பெற்று கத்ரி கோபால்நாத் சிகிச்சை பலனின்றி இன்று உயிரிழந்தார்.

கர்நாடக மாநிலம் மங்களூருவில் பிறந்த கத்ரி கோபால்நாத் இசை சேவையை பாராட்டி கடந்த 2004-இல் மத்திய அரசு பத்மஸ்ரீ விருது வழங்கியது. மேலும் கத்ரி கோபால்நாத்துக்கு தமிழக அரசு கலைமாமணி பட்டம் வழங்கி கவுரவித்துள்ளது என்பது குறிப்பிடத்தக்கது.