విజయ్ దేవరకొండ కథానాయకుడిగా తెరకెక్కుతున్న సినిమా 'నోటా'. రాజకీయ నేపథ్యంతో సాగే ఈ చిత్రానికి ఆనంద్ శంకర్ దర్శకత్వం వహిస్తున్నారు. మెహ్రీన్ క‌థానాయిక‌గా న‌టిస్తున్న ఈ చిత్రంలో.. రాజకీయ వారసుడి పాత్ర‌లో విజయ్ నటిస్తున్నారు.

తెలుగు, తమిళ భాష‌ల్లో ఏకకాలంలో రూపొందుతున్న ఈ ద్విభాషా చిత్రం ప్ర‌స్తుతం శ‌ర‌వేగంగా షూటింగ్ జరుపుకుంటోంది. ఇటీవలే ఈ సినిమాకు సంబంధించి ఫస్ట్ లుక్ ను కూడా విడుదల చేశారు.

ఇదిలా ఉంటే.. ఈ సినిమాలో సత్యరాజ్ పాత్ర చాలా ప్రత్యేకమంటున్నారు దర్శకుడు ఆనంద్ శంకర్. తనని నమ్ముకున్న ప్రజలకోసం వ్యవస్థను కూడా ఎదిరించే విధంగా ఈ పాత్ర సాగుతుందని.. ఒక విధంగా చెప్పాలంటే 'సర్కార్' చిత్రంలో అమితాబ్ బ‌చ్చ‌న్ పాత్రలా చాలా పవర్‌ఫుల్‌గా ఉంటుందని చెప్పుకొచ్చారు దర్శకుడు.

నాజర్ మ‌రో కీలక పాత్ర పోషిస్తున్న ఈ సినిమాకి.. సి.ఎస్.శ్యామ్ సంగీతం అందిస్తున్నారు. స్టూడియో గ్రీన్ పతాకంపై జ్ఞానవేల్ రాజా ఈ చిత్రాన్ని నిర్మిస్తున్నారు.