ഇന്ത്യയുടെ അഭിമാനം സാത്വിക് സായ്‌രാജ് റങ്കിറെഡ്ഡി മണിക്കൂറിൽ 565 കിലോമീറ്റർ വേഗത്തിൽ സ്മാഷ് ചെയ്ത് ലോക റെക്കോർഡ് സ്വന്തമാക്കി. ലോകത്തിൽ ഏറ്റവും വേഗത്തിൽ സ്മാഷ് ചെയ്ത് പുരുഷ ബാഡ്മിന്റൺ താരമെന്ന ഗിന്നസ് ലോക റെക്കോർഡാണ് സാത്വിക് നേടിയെടുത്തത്. ഇതോടെ മലേഷ്യൻ താരമായ ടാൻ ബൂൺ ഹിയോംഗിന്റെ ഒരു പതിറ്റാണ്ട് നീണ്ട റെക്കോർഡാണ് ഇന്ന് ഇന്ത്യൻ താരം തകർത്തത്.

മണിക്കൂറിൽ 493 കിലോമീറ്റർ വേഗതയിലുള്ള സ്മാഷ് റെക്കോർഡ് പിറന്നത് 2013-ലായിരുന്നു. സ്‌പോർട്‌സ് കമ്പനിയായ യോനക്‌സാണ് സാത്വികിൻ്റെ ഗിന്നസ് പ്രവേശന വാർത്ത പുറത്തുവിട്ടത്. ചിരാഗ് ഷെട്ടിയ്ക്കൊപ്പം പുരുഷ ഡബിൾസിൽ ഇന്ത്യയ്ക്ക് വേണ്ടി നിരവധി കിരീടങ്ങൾ നേടിയ താരമാണ് സാത്വിക്. വനിതാ താരങ്ങളിൽ ഏറ്റവും വേഗത്തിൽ സ്മാഷ് ചെയ്തതിൻ്റെ റെക്കോഡ് മലേഷ്യയുടെ ടാൻ പേളിയുടെ പേരിലാണ്. മണിക്കൂറിൽ 438 കിലോമീറ്റർ വേഗതയിലാണ് താരത്തിൻ്റെ സ്മാഷ് പിറന്നത്.