త్రిష‌తో స‌తీష్ వేగేశ్న చిత్రం?
- IndiaGlitz, [Friday,June 15 2018]
శ‌త‌మానం భ‌వ‌తి చిత్రంతో ద‌ర్శ‌కుడిగా తొలి విజ‌యాన్ని అందుకున్నారు స‌తీష్ వేగేశ్న. కుటుంబ బంధాల‌కు పెద్ద‌పీట వేస్తూ ఆయ‌న రూపొందించిన ఈ సినిమా ప్రేక్ష‌కుల రివార్డుల‌తో పాటు ప‌లు అవార్డుల‌ను సొంతం చేసుకుంది. ఇదిలా ఉంటే.. ప్ర‌స్తుతం స‌తీష్ వేగేశ్న శ‌త‌మానం భ‌వ‌తి చిత్రాన్ని నిర్మించిన దిల్ రాజు సంస్థ‌లోనే శ్రీ‌నివాస క‌ళ్యాణం చిత్రాన్ని రూపొందిస్తున్నారు.
చిత్రీక‌ర‌ణ తుదిద‌శ‌కు చేరుకున్న ఈ సినిమా ఆగ‌స్టు 9న తెర‌పైకి రానుంది. ఈ సినిమా పూర్త‌య్యేలోపే మ‌రో ఆఫ‌ర్ స‌తీష్‌ను వ‌రించింది. ప్ర‌ముఖ నిర్మాణ సంస్థ శ్రీ దుర్గా ఆర్ట్స్ బేన‌ర్‌లోనూ స‌తీష్ ఓ సినిమా చేయ‌బోతున్నారు. ఇందులో సీనియ‌ర్ క‌థానాయిక త్రిష ప్ర‌ధాన పాత్ర పోషించ‌బోతున్న‌ట్లు వార్త‌లు వినిపిస్తున్నాయి. మ‌రి ఈ వార్త‌ల్లో ఎంత నిజ‌ముందో త్వ‌ర‌లోనే తెలుస్తుంది.