கமல், ரஜினியை அடுத்து அரசியல் களத்தில் சத்யராஜ்?
- IndiaGlitz, [Sunday,March 04 2018]
உலக நாயகன் கமல்ஹாசன் புதிய அரசியல் கட்சி ஆரம்பித்து களத்தில் இறங்கிவிட்டார். சூப்பர் ஸ்டார் ரஜினிகாந்த் அரசியல் கட்சியை ஆரம்பிக்க அனைத்து ஆரம்பகட்ட பணிகளையும் கவனித்து வருவதால் எந்த நேரமும் அவருடைய அரசியல் கட்சி குறித்த அறிவிப்பு வெளியாகும் என்று கருதப்படுகிறது.
இந்த நிலையில் நடிகர் சத்யராஜ் அவர்களும் அரசியல் களத்தில் குதிக்கவுள்ளார். ஆனால் அவர் குதிப்பது நிஜ அரசியலில் இல்லை என்பதும் சினிமா அரசியலில் அவர் குதிக்கவுள்ளார் என்பதும் குறிப்பிடத்தக்கது. ஆம், சத்யராஜின் அடுத்த படம் ஒரு நடிகர், அரசியல் குதிப்பதால் ஏற்படும் பிரச்சனைகள், விளைவுகள் ஆகியவற்றை நகைச்சுவையுடன் கூறும் கதைதான் என்று கூறப்படுகிறது. 'அமைதிப்படை' உள்பட பல படங்களில் சத்யராஜ் நக்கல், நையாண்டியுடன் கூடிய அரசியல்வாதி கேரக்டரில் நடித்துள்ளதால் இந்த படமும் இன்றைய அரசியல் சூழ்நிலையை நையாண்டியுடன் படமாக இருக்கும் என்று எதிர்பார்க்கப்படுகிறது.
இந்த படத்திற்கு 'சினிமா நடிகனும் அரசியல்வாதியும்' என்ற தலைப்பு வைத்திருப்பதாக தெரிகிறது. இந்த படத்தை இயக்குனர் ஷிவராஜ் இயக்கவுள்ளார். இவர் ஏற்கனவே கடந்த 2004ஆம் ஆண்டு சத்யராஜ் நடித்த 'அடிதடி' என்ற படத்தை இயக்கியவர் என்பது குறிப்பிடத்தக்கது. இந்த படம் குறித்த முறையான அறிவிப்பு மற்றும் படக்குழுவினர் குறித்த தகவல் விரைவில் வெளியாகும் என்று எதிர்பார்க்கப்படுகிறது.