இயக்குனர் சி.எஸ்.அமுதன் இயக்கி வரும் 'தமிழ்ப்படம் 2.0' படத்தின் படப்பிடிப்பு விறுவிறுப்பாக நடைபெற்று வருகிறது. இந்த நிலையில் இன்று நடைபெறும் படப்பிடிப்பிற்கு அனைவரும் சரியான நேரத்திற்கு வந்துவிட்ட நிலையில் சதீஷ் மட்டும் படப்பிடிப்பு தளத்திற்கு வரவில்லை என தெரிகிறது.

உடனே இயக்குனர் அமுதன் தனது டுவிட்டரின் மூலம் சதீஷுக்கு டுவீட் போட்டு படப்பிடிப்புக்கு உடனே வருமாறு கேட்டுக்கொண்டார். அதற்கு பதிலளித்த சதீஷ், அப்படியெல்லாம் உடனே வந்துட முடியாது சார், நிறைய கெட்டப் இருக்கு, ரெடி ஆகிட்டுத்தான் வர முடியும் என்று கூறினார். அதற்கு பதிலளித்த அமுதன், 'இதுக்குத்தான் ஆர்ஜே பாலாஜியை போடலாம்னு சொன்னேன்' என்றுகூற ,அதற்கு சதீஷ், 'சரி ஓகே போட்டுக்கோங்க, நான் வெங்கட்பிரபு படத்துல போய் நடிச்சிக்கிறேன்' என்று கூறினார்.

இந்த நிலையில் நடிகர் ஆர்யா திடீரென குறுக்கே வந்து, '12 கெட்டப்புக்கு டைம் ஆகும்ப்பா, கொஞ்சம் வெயிட் பண்ணுங்க' என்று தனது டுவிட்டரில் பதிவு செய்தார். இந்த நிலையில் தயாரிப்பாளர் தனது டுவிட்டரில், 'சதீஷ் தம்பி ப்ளீஸ் வாங்க, எல்லோரும் வெயிட்டிங்' என்று கூற இத்துடன் இந்த பிரச்சனை முடிந்ததாக தெரிகிறது.