தேசியவிருது பெற்ற இயக்குனர் பாலாவின் இயக்கத்தில் 'தாரை தப்பட்டை' என்ற படத்தில் சசிகுமார் நடித்து முடித்த அடுத்த நாளே அவருடைய அடுத்தபடமான 'வெற்றிவேல்' என்ற படத்தின் பூஜை போடப்பட்டு படப்பிடிப்பும் விறுவிறுப்பாக நடைபெற்றது. இந்நிலையில் 'தாரை தப்பட்டை' படம் வரும் பொங்கல் தினத்தில் வெளிவருகிறது. தாரை தப்பட்டை' படத்தின் ரிலீஸுக்கு முன்பே 'வெற்றிவேல்' படத்தின் படப்பிடிப்பு முடிந்துவிட்டது. ஆம், வெற்றிவேல்' படத்தின் படப்பிடிப்பு நேற்றுடன் முடிவடைந்தது.

கடந்த சிலநாட்களாக தஞ்சை அருகே 'வெற்றிவேல்' படப்பிடிப்பு விறுவிறுப்பாக நடைபெற்று வந்த நிலையில் நேற்று படப்பிடிப்பு முடிவடைந்ததாகவும், இந்த படத்தில் தன்னுடன் பணிபுரிந்த அனைவருக்கும் நன்றி தெரிவித்துக்கொள்வதாகவும் நடிகர் சசிகுமார் தனது சமூக வலைத்தளத்தில் தெரிவித்துள்ளார். மேலும் இந்த படத்தின் கதை தனது நெஞ்சை தொட்ட கதைகளில் ஒன்று என்றும் அவர் தெரிவித்துள்ளார்.

சசிகுமாருக்கு ஜோடியாக 'இன்று நேற்று நாளை' பட நாயகி மியாஜார்ஜ் நடித்துள்ளார். மேலும் இந்த படத்தில் பிரபு, சமுத்திரக்கனி, தம்பிராமையா, ரேணுகா உள்பட பலர் நடித்துள்ளனர். டி.இமான் இசையில், எஸ்.ஆர்.கதிர் ஒளிப்பதிவில் உருவாகியுள்ள இந்த படத்தை அறிமுக இயக்குனர் வசந்தமணி என்பவர் இயக்கியுள்ளார்.