மறைந்த தமிழக முதல்வர் ஜெயலலிதா வகித்து வந்த சக்திமிக்க பதவியான அதிமுக பொதுச்செயலாளர் பதவியை கைப்பற்ற அவரது தோழி சசிகலா முயன்று வருவதாக கூறப்பட்டு வரும் நிலையில் மேலும் அதே பதவிக்கு அதிமுகவின் மாநிலங்களவை உறுப்பினர் சசிகலா புஷ்பாவும் குறி வைத்துள்ளதாக செய்திகள் வெளிவந்துள்ளது.

சமீபத்தில் ஜெயலலிதாவால் கட்சியில் இருந்து நீக்கப்பட்ட மாநிலங்களவை எம்பி சசிகலா புஷ்பா, சசிகலாவுக்கு எதிரான நடவடிக்கையில் ஈடுபட்டு வருகிறார். ஜெயலலிதா மரணத்தில் உள்ள மர்மத்தை விசாரணை செய்ய வேண்டும் என்று தொடர்ந்து வலியுறுத்தி வரும் இவர், தற்போது அதிமுக பொதுச் செயலாளர் பதவிக்கு தாம் போட்டியிடப் போவதாக அறிவித்துள்ளதால் அதிமுகவில் பரபரப்பு ஏற்பட்டுள்ளது. ஏற்கனவே இவர் அதிமுகவின் பொதுச் செயலாளராக வி.கே. சசிகலாவை தேர்ந்தெடுக்கக் கூடாது என்று சென்னை உயர்நீதிமன்றத்தில் வழக்கு தொடர்ந்துள்ளார் என்பது குறிப்பிடத்தக்கது.

இதுகுறித்து சசிகலா புஷ்பா அளித்த பேட்டியில் கூறியதாவது, 'சென்னை உயர் நீதிமன்றத்தின் தீர்ப்பை பொறுத்து, அதிமுக பொதுச் செயலாளர் பதவிக்கு போட்டியிடுவது பற்றி முடிவு செய்வேன். கட்சியின் அடிப்படை உறுப்பினர் என்ற அடிப்படையில் பொதுச் செயலாளர் பதவிக்கு போட்டியிட எனக்கு உரிமை உள்ளது' என்று கூறினார்.