தளபதி விஜய் நடித்த 'சர்கார்' திரைப்படம் நாளை வெளியாகவுள்ள நிலையில் இந்த படம் இணையத்தில் வெளியாகாத வகையில் படக்குழுவினர்கள் அனைத்து முன்னேற்பாடுகளும் செய்துள்ளனர். குறிப்பாக இந்த படம் வெளிநாட்டில் முந்தைய நாளில் பிரிமியர் காட்சிகள் கிடையாது. இந்தியாவில் காட்சி ஆரம்பிக்கும் நேரத்தில்தான் வெளிநாட்டிலும் காட்சி ஆரம்பமாகவுள்ளது.

மேலும் இந்த படத்தை இணையதளத்தில் வெளியிட தடைவிதிக்க வேண்டும் என தயாரிப்பு நிறுவனம் தாக்கல் செய்த மனுவின் அடிப்படையில் 'சர்கார்' படத்தை எந்தவொரு இணையதளத்திலும் வெளியிடக்கூடாது என சென்னை உயர்நீதிமன்றம் தடை விதித்துள்ளது.

இந்த நிலையில் திரையுலகினர்களுக்கு சிம்ம சொப்பனமாக இருந்து வரும் தமிழ் ராக்கர்ஸ் தனது சமூக வலைத்தளத்தில் 'சர்கார் படத்தின் ஹெச்.டி. பிரிண்ட் இணையதளத்தில் வெளியிடப்படும்' என டுவீட் செய்துள்ளது. இந்த டுவீட் படக்குழுவினர்களுக்கு மட்டுமின்றி விஜய் ரசிகர்களுக்கும் அதிர்ச்சியை ஏற்படுத்தியுள்ளது.

இந்த அளவுக்கு பகிரங்கமாக, சட்டவிரோதமாக ஒரு அறிவிப்பை ஒரு இணையதளம் வெளியிட்டுள்ளதற்கு கண்டனம் தெரிவித்துள்ள விஜய் ரசிகர்கள், அரசு இதுகுறித்து உரிய நடவடிக்கை எடுக்க வேண்டும் என வலியுறுத்தி வருகின்றனர்.