சசிகுமாருக்கு உதவி செய்யும் சரத்குமாரின் குடும்பம்
- IndiaGlitz, [Friday,August 02 2019]
பிரபல நடிகர், இயக்குனர் சசிகுமாரின் அடுத்த படத்தின் ஃபர்ஸ்ட்லுக் போஸ்டரை சரத்குமார், ராதிகா சரத்குமார், மற்றும் வரலட்சுமி சரத்குமார் ஆகிய மூவரும் இணைந்து வெளியிட உள்ளதாக அறிவிக்கப்பட்டுள்ளது.
நடிகர் சசிகுமார் நடித்து வரும் படங்களில் ஒன்று 'ராஜவம்சம்'. இந்த படத்தை இயக்குநர் சுந்தர் சி உதவியாளர் கதிர்வேலு இயக்கி வருகிறார். சசிகுமார் ஜோடியாக நிக்கி கல்ராணி நடித்து வரும் இந்த படத்தில் சதீஷ், யோகி பாபு, மனோபாலா, தம்பி ராமையா, உட்பட 49 பிரபலங்கள் நடித்து வருகின்றனர். சசிகுமாரின் 19 வது படமாக உருவாகி வரும் இந்த படத்திற்கு சாம் சிஎஸ் இசையமைக்கின்றார். குடும்ப சென்டிமென்ட் மற்றும் காமெடி நிறைந்த படமாக உருவாகி வரும் இந்த படத்தை டி.ராஜா தயாரித்து வருகிறார்.
இந்த நிலையில் 'ராஜவம்சம்' திரைப்படத்தின் பர்ஸ்ட் லுக் போஸ்டரை நாளை அதாவது ஆகஸ்ட் 3ஆம் தேதி காலை 10.45 மணிக்கு சரத்குமார், ராதிகா சரத்குமார், மற்றும் வரலட்சுமி சரத்குமார் ஆகியோர் இணைந்து வெளியிடவுள்ளனர். ஏற்கனவே சசிகுமாரும், சரத்குமாரும் 'நாநா' என்ற படத்தில் இணைந்து நடித்து வருகின்றனர் என்பதும் இந்த படத்தை விஜய் ஆண்டனி நடித்த 'சலீம்' படத்தை இயக்கிய இயக்குனர் நிர்மல்குமார் இயக்கி வருகிறார் என்பதும் குறிப்பிடத்தக்கது.