తమిళ దర్శకుడు సుందర్. సి రూపొందిస్తున్న భారీ బ‌డ్జెట్‌ సినిమా 'సంఘమిత్ర'. ప్రస్తుతం చెన్నైలో ప్రీ-ప్రొడక్షన్ పనులు జ‌రుగుతున్నాయి. రూ. 200 కోట్లకు పైగా బడ్జెట్టుతో తెరకెక్కుతున్న ఈ చిత్రం .. ఒక తమిళ చారిత్ర‌క గాధగా రూపొందించబడుతుంద‌ని తెలిసింది. లోఫ‌ర్ ఫేమ్ దిశా పటాని టైటిల్‌ రోల్ పోషిస్తుండగా.. ఇందులో త‌మిళ క‌థానాయ‌కులు జయం రవి, ఆర్య హీరోలుగా నటిస్తున్నారు.

ఈ సినిమాని తెలుగు, హిందీ భాషల్లో కూడా డబ్బింగ్ చేయబోతున్నారు. 'బాహుబలి2' తర్వాత ఇంత భారీ బడ్జెట్టుతో తెరకెక్కుతోన్న సినిమా ఇదే కావడం విశేషం. శ్రీ తేనాండల్ ఫిలిమ్స్ పతాకంపై మురళి రామస్వామి, ఎన్. రామస్వామి, హేమ రుక్మిణి నిర్మిస్తున్నారు.

డ‌బుల్ ఆస్కార్ అవార్డ్స్ విన్న‌ర్‌.. ఎ.ఆర్‌. రెహ్మాన్ సంగీతాన్ని అందిస్తున్న ఈ సినిమాలో.. ప్ర‌ముఖ న‌టీన‌టులు కీలక పాత్రలను పోషించనున్నారు. తమిళ్ న్యూ ఇయర్ పురస్కరించుకుని ఏప్రిల్ 11, 2018 నుంచి ఈ మూవీ రెగ్యులర్ షూటింగ్ జరుపుకోనుంద‌ని తెలిసింది.