சமுத்திரக்கனியின் 'அப்பா'வுக்கு கிடைத்த அடுத்த மரியாதை
- IndiaGlitz, [Wednesday,July 13 2016]
சமுத்திரகனி நடித்து, இயக்கி, தயாரித்த 'அப்பா' திரைப்படம் கடந்த 1ஆம் தேதி வெளியாகி ஊடகங்களின் பாசிட்டிவ் விமர்சனங்களால் மாபெரும் வெற்றி பெற்றதோடு இன்னும் திரையரங்குகளில் வெற்றிகரமாக ஓடிக்கொண்டிருக்கின்றது. இந்த படத்தை எல்லா அப்பாக்களும் பார்க்க வேண்டும் என்று ஒரு தலைமை ஆசிரியர் சுற்றறிக்கை அனுப்பியதையும் நேற்று பார்த்தோம்.
அதுமட்டுமின்றி தற்போது வெளிவந்துள்ள புதிய தகவலின்படி இந்த படத்தை தேனி, கோவை போன்ற பகுதிகளில் உள்ள பள்ளிகளில் குழந்தைகளுக்காக சிறப்பு காட்சி ஏற்பாடு செய்யப்பட்டுள்ளதாக தெரிகிறது. இந்த செய்திகள் ஒரு தயாரிப்பாளர் மற்றும் இயக்குனர் என்ற வகையில் சமுத்திரக்கனிக்கு மிகுந்த மகிழ்ச்சியை கொடுத்துள்ளது.
இந்நிலையில் இந்த படத்தை கன்னடம் மற்றும் இந்தியில் டப் அல்லது ரீமேக் செய்ய சமுத்திரக்கனி பேச்சுவார்த்தை நடத்தி வருவதாகவும் இதுகுறித்த அறிவிப்பு மிக விரைவில் வெளியாகும் என்றும் சமுத்திரக்கனி பேட்டி ஒன்றில் தெரிவித்துள்ளார். இது இந்த படத்திற்கு கிடைத்த அடுத்த மரியாதையாக கருதப்படுகிறது.
இந்த படத்தின் வெற்றி காரணமாக சமூக அக்கறையுள்ள படங்கள் அதிகம் தயாரிக்க வேண்டும் என்ற ஆர்வம் தனக்கு ஏற்பட்டுள்ளதாக சமுத்திரக்கனி மேலும் தெரிவித்துள்ளார்.