చిత్ర పరిశ్రమ విచిత్రమైంది. మహాసముద్రం లాంటి ఇక్కడ నిలదొక్కుకోవడం అంత ఆషామాషీ కాదు. టన్నులకొద్దీ టాలెంట్ వున్నా.. ఆవగింజంత అదృష్టం కూడా వుండాలి. అందుకే అతికొద్దిమంది మినహా ఇక్కడ స్టార్‌లుగా మారాలని వచ్చిన వారి అడ్రస్ గల్లంతే. ఇకపోతే.. సాధారణంగా హీరోలతో పోలిస్తే హీరోయిన్ల కెరీర్ స్పాన్ చాలా తక్కువ. మహా అయితే ఐదేళ్లు, లేదా మంచి హిట్లు పడితే ఇంకో రెండేళ్లు అంతేకానీ బ్లాక్ అండ్ వైట్ రోజుల్లోని హీరోయిన్ల మాదిరి దశాబ్ధాల తరబడి వెండితెరను ఏలడం కుదరని పని. రంగుల ప్రపంచం లాంటి చిత్ర పరిశ్రమకు ఎంతో మంది హీరోయిన్లు వస్తూ వుంటారు. కానీ కొంత మంది మాత్రమే ఎప్పటికీ ప్రేక్షకులకు గుర్తుండిపోతారు. వారు ఎంచుకునే పాత్రలు, ప్రతిభ, నటన వారికి అంతటి గుర్తింపును తెచ్చిపెడతాయి. అలాంటి అద్భుతమైన నటీమణుల్లో ఒకరు సమంత.

వ్యక్తిగత సమస్యలు, అనారోగ్యంతో సినిమాలకు సమంత బ్రేక్ :

దక్షిణాదిలో అగ్ర కథానాయికగా వెలుగొందుతున్న ఆమె కాలానికి తగినట్లుగా తనను తాను మార్చుకున్నారు. అందరీ హీరోయిన్ల మాదిరిగా దక్షిణాదిలో వచ్చిన క్రేజ్‌తో బాలీవుడ్‌లో ఎదిగిపోతామని కాకుండా .. అక్కడ వెబ్‌సిరీస్‌లు చేసుకుంటూ పాన్ ఇండియా స్థాయిలో పేరు తెచ్చుకుంటున్నారు. ఆవిడ నటించిన ది ఫ్యామిలీ మెన్ సిరీస్ ఎంతగా విజయవంతమైందో చెప్పనక్కర్లేదు. పుష్ప సినిమాలో ‘‘ఊ అంటావా మావ ఊఊ అంటావ మామ’’తో దేశాన్ని ఊపేశారు. ప్రస్తుతం వ్యక్తిగత సమస్యలు, అనారోగ్యం కారణంగా సినిమాలకు దూరంగా వున్నారు సామ్. అయినప్పటికీ ఆమె పాపులారిటీ కాస్త కూడా తగ్గలేదట.

బీ టౌన్ బ్యాచ్‌ను సైతం వెనక్కి నెట్టిన సామ్ :

భారతదేశంలోనే మోస్ట్ పాపులర్ ఫిమేల్ స్టార్స్ 2023 జాబితాలో సమంత అగ్రస్థానంలో నిలిచారు. ఈ మేరకు ఓర్మాక్స్ మీడియా సంస్థ ఓ జాబితా రూపొందించింది. అలియా భట్, దీపిక పదుకొణే, నయనతార వంటి అగ్ర కథానాయికలను సైతం వెనక్కి నెట్టి సమంత అగ్రస్థానాన్ని అందుకోవడం విశేషం. అయితే ఈ లిస్ట్‌లో నెంబర్‌వన్‌గా నిలవడం సమంతకు ఇదే తొలిసారి కాదు. తన ఫిల్మ్ కెరీర్‌లో ఇప్పటికే 8 సార్లు ఆమె ఈ ఘనత సాధించారు. ఇక దక్షిణాదితో పాటు బాలీవుడ్‌లో వరుస ఆఫర్లతో దూసుకెళ్తోన్న నేషనల్ క్రష్ రష్మిక మందన్న ఈ లిస్ట్‌లో పదవ స్థానంలో నిలవడం గమనార్హం.

ఓర్మాక్స్ మోస్ట్ పాపులర్ ఫిమేల్ స్టార్స్ 2023 :

1. సమంత రూత్ ప్రభు
2. అలియా భట్
3. దీపిక పదుకొణే
4. నయనతార
5. కాజల్ అగర్వాల్
6. త్రిష
7. కత్రీనా కైఫ్
8. కియారా అద్వానీ
9. కీర్తి సురేశ్
10. రష్మిక మందన్న