சிவகார்த்திகேயன் நடிப்பில் இயக்குனர் பொன்ராம் இயக்கியுள்ள 'சீமராஜா' படத்தின் படப்பிடிப்பு முடிவடைந்து தற்போது போஸ்ட் புரடொக்சன்ஸ் பணிகள் நடைபெற்று வருகிறது. முதல்கட்டமாக இந்த படத்தின் டப்பிங் பணிகள் சமீபத்தில் தொடங்கப்பட்டு தற்போது விறுவிறுப்பாக நடைபெற்று வருகிறது.

கடந்த சில மாதங்களாக சமந்தா தான் நடிக்கும் படங்களுக்கு சொந்தக்குரலில் டப்பிங் செய்து வரும் நிலையில் 'சீமராஜா' படத்திற்கும் அவரே டப்பிங் செய்துள்ளார். இந்த நிலையில் இன்றுடன் அவரது பகுதி டப்பிங் பணி முடிந்துவிட்டதாக அவர் தனது சமூக வலைத்தளத்தில் தெரிவித்துள்ளார். அதேபோல் இந்த படத்தில் நடித்துள்ள சூரியும் அவரது பகுதி டப்பிங்கை முடித்துவிட்டார். இந்த படம் வரும் வினாயகர் சதுர்த்தி தினத்தில் வெளியிட திட்டமிடப்பட்டுள்ளது.

மேலும் சமந்தா நடித்த 'சீமராஜா', 'சூப்பர் டீலக்ஸ்' மற்றும் 'யூடர்ன்' ஆகிய மூன்று படங்களும் இந்த ஆண்டே வெளியாகவுள்ளதாக தெரிகிறது. ஏற்கனவே இந்த ஆண்டில் சமந்தா நடிப்பில் 'இரும்புத்திரை', 'நடிகையர் திலகம்' மற்றும் 'ரங்கஸ்தலம்' ஆகிய மூன்று படங்கள் வெளியாகி மூன்றுமே வெற்றி பெற்றுள்ளது என்பது குறிப்பிடத்தக்கது.