మాట నిల‌బెట్టుకున్న సల్మాన్
- IndiaGlitz, [Thursday,September 26 2019]
బాలీవుడ్ కండ‌ల‌వీరుడు సల్మాన్ ఖాన్ ప్ర‌స్తుతం ప్ర‌భుదేవా ద‌ర్శ‌క‌త్వంలో 'ద‌బంగ్ 3' సినిమాను చేస్తున్నాడు. ఈ సినిమాను పూర్తి చేయ‌గానే, సంజ‌య్‌లీలా భ‌న్సాలీతో క‌లిసి 'ఇన్‌షా అల్లా' సినిమా చేయబోతున్నట్లు ప్ర‌క‌టించాడు. వ‌చ్చే ఏడాది ఈద్‌కు ఈ సినిమాను విడుద‌ల చేస్తామ‌ని ఆలియాభ‌ట్ హీరోయిన్‌గా న‌టిస్తుంద‌ని కూడా తెలియ‌జేశారు. అయితే ఏమైందో ఏమో కానీ.. ఉన్న‌ట్లుండి సినిమా అట‌కెక్కింది. సినిమా ఆగిపోయింద‌ని చెప్పిన సల్మాన్, వ‌చ్చే ఏడాది ఈద్‌కు త‌ప్ప‌కుండా అభిమానుల ముందుకు మ‌రో సినిమాతో వ‌స్తాన‌ని తెలిపారు. అన్న‌మాట ప్ర‌కార‌మే, స‌ల్మాన్‌ఖాన్ వెంట‌నే త‌న త‌దుప‌రి సినిమాను ప్ర‌భుదేవా ద‌ర్శ‌క‌త్వంలో చేయబోతున్నట్లు ప్ర‌క‌టించాడు. ఈ కొత్త సినిమాను వ‌చ్చే ఏడాది ఈద్‌కు విడుద‌ల చేస్తామ‌ని తెలిపారు.
హ్యాట్రిక్ మూవీ...
సల్మాన్, ప్ర‌భుదేవా కాంబినేష‌న్‌లో హ్యాట్రిక్ మూవీని ప్ర‌క‌టించాడు. ఇది వ‌ర‌కు వీరిద్ద‌రి కాంబినేష‌న్‌లో వాంటెడ్‌(పోకిరి రీమేక్‌) రూపొందింది. ఇప్పుడు ద‌బంగ్ సీక్వెల్‌లో మూడో భాగం రూపొందుతోంది. ఇది పూర్తి కాక‌మునుపే మూడో సినిమాను ప్ర‌క‌టించడం విశేషం. ఈ సినిమాకు రాధే అనే టైటిల్ ప‌రిశీలన‌లో ఉన్న‌ట్లు వార్త‌లు విన‌ప‌డుతున్న‌ప్ప‌టికీ సల్మాన్ మాత్రం త‌మ సినిమా పేరు రాధే కాద‌ని చెప్పుకొచ్చాడు. త్వ‌ర‌లోనే ఈ సినిమాకు సంబంధించిన వివ‌రాల‌ను ప్ర‌క‌టించ‌నున్నారు. ప్ర‌స్తుతం ద‌బంగ్ 3 సినిమా చిత్రీక‌ర‌ణ శ‌ర‌వేగంగా జ‌రుగుతుంది.