ఫిదా చిత్రంతో తెలుగు ప్రేక్ష‌కుల హృద‌యాల‌ను కొల్ల‌గొట్టిన త‌మిళ పొన్ను సాయిప‌ల్ల‌వి తన‌దైన శైలిలో విభిన్న‌మైన పాత్ర‌ల్లో న‌టిస్తుంది. ప్ర‌స్తుతం ఈమె న‌టిస్తోన్న చిత్రాల్లో ‘విరాట‌ప‌ర్వం’ ఒక‌టి. రానా దగ్గుబాటి హీరోగా న‌టిస్తున్న ఈ చిత్రంలో సాయిప‌ల్ల‌వి హీరోయిన్‌గా న‌టిస్తోంది. ఈ సినిమా నుంచి గురువారం ‘కోలు కోల‌మ్మా..’ అనే లిరిక‌ల్‌ సాంగ్‌ను హీరో వెంక‌టేశ్ ట్విట్ట‌ర్ ద్వారా విడుద‌ల చేశారు. వేణు ఊడుగుల ద‌ర్శ‌క‌త్వంలో తెర‌కెక్కుతోన్న విరాట‌ప‌ర్వంలో రవ‌న్న పాత్ర‌లో రానా న‌టిస్తున్న సంగ‌తి తెలిసిందే. సాయిప‌ల్ల‌వి పాత్ర గురించి ప‌లు ఆస‌క్తిక‌ర‌మైన వార్త‌లు వినిపించినా, చిత్ర యూనిట్ మాత్రం ఏ విష‌యాన్ని అధికారికంగా ప్ర‌క‌టించ‌లేదు.

‘కోలు కోల‌మ్మా..’ సాంగ్ విషయానికి వస్తే ఈ పాట‌ను చంద్ర‌బోస్ రాయ‌గా, దివ్యా మాలిక్ పాడింది. జాన‌ప‌ద శైలిలో పాట సాగుతుంది. ఎస్ఎల్‌వీ సినిమాస్‌, సురేష్ ప్రొడ‌క్ష‌న్స్ బ్యాన‌ర్స్‌పై సుధాక‌ర్ చెరుకూరి ఈ చిత్రాన్ని నిర్మిస్తున్నారు. డి.సురేష్‌బాబు చిత్ర స‌మ‌ర్ప‌కుడిగా వ్య‌వ‌హ‌రిస్తున్నారు. అన్ని కార్య‌క్ర‌మాల‌ను పూర్తి చేసి ఏప్రిల్ 30న సినిమాను విడుద‌ల చేయ‌డానికి స‌న్నాహాలు చేస్తున్నారు.