శ‌ర్వానంద్‌తో మ‌రోసారి సాయిపల్లవి?
- IndiaGlitz, [Monday,April 16 2018]
యువ కథానాయకుడు శర్వానంద్, టాలెంటెడ్ బ్యూటీ సాయిపల్లవి జంటగా హను రాఘవపూడి దర్శకత్వంలో తెరకెక్కుతున్న సినిమా ‘పడి పడి లేచె మనసు’. రొమాంటిక్, ఫ్యామిలీ ఎంటర్‌టైనర్‌గా రూపుదిద్దుకుంటున్న ఈ చిత్రాన్ని.. శ్రీ లక్ష్మి వెంకటేశ్వర సినిమాస్ పతాకంపై ప్రసాద్ చుక్కపల్లి, సుధాకర్ చెరుకూరి నిర్మిస్తున్నారు. ప్రస్తుతం శరవేగంగా చిత్రీకరణ జరుపుకుంటోందీ చిత్రం. ఇటీవల తొలి షెడ్యూల్‌ను కోల్‌క‌తాలో పూర్తి చేశారు. రెండో షెడ్యూల్‌ను నేపాల్‌లోని కాట్మండులో చిత్రీకరించనున్నార‌ని తెలిసింది.
ఇదిలా ఉంటే.. శ్రీవిష్ణు హీరోగా ‘నీది నాది ఒకే కథ’ చిత్రాన్ని రూపొందించి విజయాన్ని అందుకున్న వేణు ఊడుగుల.. అతి త్వరలో త‌న రెండో చిత్రానికి శ్రీ‌కారం చుట్టనున్నారు. ఇందులోనూ శర్వానంద్, సాయిపల్లవి జంటగా నటించనున్నట్లు వార్తలు వినిపిస్తున్నాయి. ఈ చిత్రాన్ని కూడా ‘పడి పడి లేచె మనసు’ నిర్మాతలు ప్రసాద్ చుక్కపల్లి, సుధాకర్ చెరుకూరి నిర్మించ‌నున్నార‌ని తెలిసింది. కాగా.. ఈ సినిమా 90వ దశకంలో సాగిన నక్సల్స్ తిరుగుబాటు నేపథ్యంలో తెర‌కెక్క‌బోతోంద‌ని సమాచారం. ఈ సినిమాకి సంబంధించి మరిన్ని విషయాలు త్వరలో వెల్లడికానున్నాయి.