హీరోయిన్‌గా తెరంగేట్రం చేయ‌డం వేరు. ఆ త‌ర్వాత ఓ హిట్టు సాధించ‌డం, దాన్ని నిల‌బెట్టుకోవ‌డం వేరు. ఇప్పుడు తాను సాధించిన విజ‌యాన్ని నిల‌బెట్టుకుంటూ, మ‌రింత వేగంగా ముందుకు దూసుకుపోయే ప‌నుల్లో ఉన్నారు సాయిప‌ల్ల‌వి. సూర్య భార్య‌గా ఆమె న‌టించిన 'ఎన్.జి.కె' శుక్ర‌వారం విడుద‌లైంది.

ఈ సినిమా గురించి సాయిప‌ల్ల‌వి ట్విట్ట‌ర్‌లో కొంద‌రు అడిగిన ప్ర‌శ్న‌ల‌కు స‌మాధాన‌మిచ్చారు. అందులో భాగంగా శేఖ‌ర్ క‌మ్ముల‌, శ్రీరాఘ‌వ వంటి ద‌ర్శ‌కుల‌తో ప‌నిచేసిన త‌ర్వాత త‌న‌కు సినిమాపై గౌర‌వం పెరిగింద‌ని తెలిపారు. త‌న కుటుంబంలో ఎవ‌రూ సినిమా రంగంలో లేన‌ప్ప‌టికీ తానూ మాత్రం ఈ రంగంలో స‌క్సెస్‌ఫుల్‌గా కొన‌సాగ‌డం ఎలా కుదురుతుందో చెప్ప‌లేన‌న్నారు.

సెట్లో ఉన్న‌ప్పుడు త‌న‌కు చుట్టూ ఎవ‌రూ క‌నిపించ‌ర‌ని, కేవ‌లం పాత్ర మాత్ర‌మే గుర్తుంటుంద‌ని తెలిపారు. తెలుగులో సినిమాల‌కు డ‌బ్బింగ్ చెప్పుకొంటున్న‌ట్టు చెప్పారు. త్వ‌ర‌లో విరాట‌ప‌ర్వం సినిమా చేయ‌బోతున్న‌ట్టు పేర్కొన్నారు. త‌న పుట్టిన‌రోజున అభిమానులు చెట్లు నాట‌డం ప‌ట్ల హ‌ర్షం వ్య‌క్తం చేశారు.