தனுஷின் 'மாரி 2' நாயகி அறிவிப்பு
- IndiaGlitz, [Friday,September 29 2017]
தனுஷின் வெற்றி படங்களில் ஒன்றான மாரி' படத்தின் இரண்டாம் பாகமான 'மாரி 2' படத்தின் அதிகாரபூர்வ அறிவிப்பு சமீபத்தில் வெளிவந்த நிலையில் இந்த படத்தின் படப்பிடிப்பு அடுத்த வாரம் தொடங்கவுள்ளது. இந்த படத்தின் வில்லனாக தனுஷ் தயாரித்து வரும் மலையாள படமான 'தரங்கம்' படத்தின் நாயகன் டோவினோ தாமஸ் என ஏற்கனவே அறிவிக்கப்பட்ட நிலையில் தற்போது இந்த படத்தின் நாயகி அறிவிக்கப்பட்டுள்ளார்.
ஆம், 'மாரி 2' படத்தின் நாயகி சாய்பல்லவி என்று அறிவிக்கப்பட்டுள்ளது. 'பிரேமம்' படத்தின் மூலம் தென்னிந்தியா முழுவதும் பிரபலமான சாய்பல்லவி, ஏற்கனவே இயக்குனர் விஜய்யின் 'கரு' படத்தில் நடித்து வரும் நிலையில் 'மாரி 2' அவரது இரண்டாவது தமிழ் படமாக அமைந்துள்ளது.
தமிழ், தெலுங்கு என ஒரே நேரத்தில் உருவாகவுள்ள இந்த படத்தை பாலாஜிமோகன் இயக்கவுள்ளார். மேலும் 'மாரி' படத்தின் வெற்றிக்கு மிக முக்கிய காரணமாக இருந்த அனிருத் இந்த இரண்டாம் பாகத்திலும் தொடர்வாரா? அல்லது வேறு இசையமைப்பாளர் இந்த படத்தில் பணியாற்றுவாரா? என்பது குறித்த அறிவிப்பை படக்குழுவினர் விரைவில் வெளியிடவுள்ளனர்.