‘జయం’ చిత్రంతో ఆకట్టుకున్న ఉత్తరాది భామ సదా నిర్మాతగా మారనున్నారా? అవుననే అంటున్నాయి కోలీవుడ్ వర్గాలు. ఆ వివరాల్లోకి వెళితే.. మజిద్ దర్శకత్వంలో సదా కథానాయికగా న‌టిస్తున్న త‌మిళ చిత్రం ‘టార్చ్‌లైట్’. ఓ వేశ్యా జీవితానికి సంబంధించిన కథగా ఈ సినిమా రూపుదిద్దుకుంటున్న‌ట్టు తెలుస్తోంది. కథానాయికా ప్రాధాన్యత ఉన్న ఈ సినిమా కోసం చాలా మంది కథానాయికలను సంప్రదించారంట ద‌ర్శ‌కుడు.

కాకపోతే.. పడుపు వృత్తికి సంబంధించిన కథ కావడంతో కథానాయికలు ఎవరూ ఈ సినిమాలో నటించడానికి ముందుకు రాలేదంట. ఇలాంటి స‌మ‌యంలో సదా  ఈ సినిమాలో నటించడానికి ధైర్యంగా ముందుకొచ్చిందని సమాచారం. అంతేగాకుండా.. దర్శకుడి పనితీరు బాగా నచ్చి.. అతని ద‌ర్శ‌క‌త్వంలో త‌నే నిర్మాత‌గా ఓ చిత్రాన్ని నిర్మించడానికి కూడా సదా ప్లాన్ చేస్తున్నార‌న్న‌ది చెన్నై వ‌ర్గాల స‌మాచారం. కాగా.. ‘టార్చ్‌లైట్’ చిత్రాన్ని తెలుగులోనూ విడుద‌ల చేయ‌డానికి స‌న్నాహాలు జ‌రుగుతున్నాయి.