நெல்லையில் இருந்து டெல்லிக்கு செல்லும் சியானின் 'ஆறுச்சாமி'
- IndiaGlitz, [Sunday,July 02 2017]
சீயான் விக்ரம் நடிப்பில் ஹரி இயக்கிய 'சாமி' திரைப்படம் கடந்த 2003ஆம் ஆண்டு வெளிவந்து சூப்பர் ஹிட் ஆன நிலையில் 14 வருடங்கள் கழித்து தற்போது இந்த படத்தின் இரண்டாம் பாகம் தயாராகவுள்ளது. இந்த படத்தின் ஆரம்பகட்ட பணிகள் ஏற்கனவே தொடங்கிவிட்ட நிலையில் தற்போது இந்த படத்திற்கான லொகேஷன் தேடும் பணி நடந்து வருகிறது.
இயக்குனர் ஹரி குழுவினர் இந்திய தலைநகர் டெல்லியில் இந்த படத்தின் படப்பிடிப்பிற்கான லொகேஷன் பார்க்கும் பணியை நடத்தி வருவதாக செய்திகள் வெளிவந்துள்ளது. இந்த படத்தின் முதல் பாகம் நெல்லையை மையமாக வைத்து உருவாக்கப்பட்ட நிலையில் இரண்டாம் பாகம் டெல்லியை மையமாக வைத்து திரைக்கதை அமைக்கப்பட்டுள்ளதாக கூறப்படுகிறது. நெல்லையை கலக்கிய ஆறுச்சாமி தலைநகர் டெல்லியில் என்ன செய்ய காத்திருக்கின்றார் என்பதை பொறுத்திருந்து பார்ப்போம்.
விக்ரம், கீர்த்திசுரேஷ், த்ரிஷா உள்பட பலர் நடிக்கும் இந்த படத்திற்கு தேவிஸ்ரீ பிரசாத் இசையமைக்கவுள்ளார். சிபுதமீன்ஸ் தயாரிக்கும் இந்த படத்தின் படப்பிடிப்பு விரைவில் தொடங்கும் என எதிர்பார்க்கப்படுகிறது.