యంగ్ రెబల్ స్టార్ ప్రభాస్, బాలీవుడ్ బ్యూటీ శ్రద్ధా కపూర్ జంటగా తెరకెక్కుతున్న చిత్రం ‘సాహో’.  ఈ సినిమాకి యంగ్ డైరెక్టర్ సుజిత్ దర్శకత్వం వహిస్తున్నారు.  యు.వి క్రియేషన్స్ పతాకంపై వంశీ కృష్ణ, ప్రమోద్ ఈ చిత్రాన్ని నిర్మిస్తున్నారు. తెలుగుతో పాటు తమిళం, హిందీ భాషల్లో కూడా రూపుదిద్దుకుంటోంది ఈ సినిమా. ప్రస్తుతం అబుధాబిలో యాక్షన్ సన్నివేశాలను చిత్రీకరిస్తున్నారు.

ఇదిలా ఉంటే.. ఈ సినిమా హిందీ వెర్ష‌న్‌కు సంబంధించిన థియేట్రిక‌ల్ హక్కులు భారీ స్థాయిలో అమ్ముడయ్యాయ‌ని వార్తలు వినిపిస్తున్నాయి. ఆ వివరాల్లోకి వెళితే.. ఓ ప్రముఖ బాలీవుడ్ సంస్థ హిందీ థియేట్రిక‌ల్‌ హక్కుల్ని రూ.120 కోట్లకి కొన్నట్లు సమాచారం. దీంతో.. సగానికి పైగా పెట్టుబడిని నిర్మాతలు వెనక్కి రాబట్టుకున్న‌ట్టేన‌ని ట్రేడ్ వర్గాలు చెప్పుకుంటున్నాయి. ఈ చిత్రంలో బాలీవుడ్‌కి చెందిన‌ శ్రద్ధా కపూర్, నీల్ నితిన్ ముఖేష్, జాకీ ష్రాఫ్, మందిరా బేడి వంటి న‌టీన‌టులు న‌టిస్తుండ‌డంతో.. సినిమా మీద న‌మ్మ‌కంతో పాటు లాభాలు కూడా వస్తాయనే ఆలోచ‌న‌తో.. ఇంత భారీ ధరకు ఆ సంస్థ కొన్నద‌ని బాలీవుడ్‌లో ముచ్చటించుకుంటున్నారు.  అలాగే ‘బాహుబలి’ సిరీస్‌తో ప్రభాస్ సంపాదించుకున్న క్రేజ్ కూడా ఓ కార‌ణ‌మ‌ని  మ‌రికొంత‌మంది చెప్పుకుంటున్నారు. కాగా, వ‌చ్చే ఏడాదిలో ఈ సినిమా ప్రేక్ష‌కుల ముందుకు రానుంది.