యంగ్ రెబల్‌స్టార్ ప్రభాస్, యువ ద‌ర్శ‌కుడు సుజిత్ కాంబినేషన్‌లో తెరకెక్కుతున్న చిత్రం ‘సాహో’. బాలీవుడ్ నటి శ్రద్ధా కపూర్.. ప్రభాస్‌తో కలిసి తెరను పంచుకోనుంది.

ఇదిలా ఉంటే.. ఈ సినిమాకి సంబంధించి కొన్ని యాక్షన్ సన్నివేశాలను అబుద‌బీలో చిత్రీకరించాలని తొలుత యూనిట్ ప్లాన్ చేసింది. కాని అక్కడ పర్మిషన్‌లు రావడం ఆలస్యమవుతోందని భావించి.. హైదరాబాద్ రామోజీ ఫిలింసిటీలో ఆ యాక్షన్ సన్నివేశాలను తెర‌కెక్కించాల‌ని నిర్ణ‌యించింది.

అయితే అది చాలా ఖర్చుతో కూడుకోవడంతో.. మళ్ళీ అబుద‌బీలోనే చిత్రీక‌రించేందుకు స‌న్నాహాలు జ‌రుగుతున్నాయి. తాజాగా ఈ విష‌య‌మై అనుమతి కూడా లభించింది. ఇక చిత్రీకరణే తరువాయి అనుకున్న తరుణంలో.. కథానాయిక శ్రద్ధా కపూర్ రూపంలో మరో చిక్కువచ్చి పడింది. 

ప్రస్తుతం శ్రద్ధా బాలీవుడ్‌లో మంచి ఫాలోయింగ్ ఉన్న నటి కావడంతో.. ఆమెను హీరోయిన్‌గా పెట్టుకుంటే ప్రమోషన్‌లలో హెల్ప్ అవుతుందని భావించి.. శ్రద్ధాను ఎంపిక చేశారు. ఈమె మాత్రం ఈ సినిమా ఒప్పుకోవడానికి ముందే.. మరో రెండు హిందీ సినిమాలకి కాల్షీట్స్ ఇచ్చింది. అయితే ఇప్ప‌టివ‌ర‌కు ఏదో రకంగా మూడు సినిమాలకు డేట్స్ అడ్జ‌స్ట్‌ చేసి ఇచ్చింది.

అయితే.. 'సాహో' చిత్రం విష‌యంలో అనుకున్న టైమ్‌కి షూటింగ్ జరగకపోవడంతో.. ఈ డేట్స్ వ్యవహారం తలనొప్పిగా తయారైందని సమాచారం. అయితే.. ఇప్పటికే 'బట్టి గుల్ మీటర్ చాలు; చిత్రాన్ని పూర్తి చేసిన శ్ర‌ధ్ధా.. ప్రస్తుతం 'స్త్రీ' సినిమా షూటింగ్‌లో పాల్గొంటోంది.

ఇది పూర్తయితే గాని 'సాహో' చిత్రీకరణలో పాల్గొన‌లేని పరిస్థితి శ్రద్ధాది. అందుకే ఇప్పుడు పర్మిషన్‌లు వచ్చినా.. ఆమెలేని సన్నివేశాలను చిత్రీకరించి.. ఆ తర్వాత త‌ను ఉన్న‌ సన్నివేశాలను షూట్ చేయాల‌ని చిత్ర యూనిట్ భావిస్తోంద‌ని టాక్.