‘దృశ్యం’ దర్శకుడు మృతి అంటూ పుకార్లు.. మాధవన్ సహా సంతాపం..
- IndiaGlitz, [Monday,August 17 2020]
హిందీ ‘దృశ్యం’ దర్శకుడు నిషికాంత్ కామత్ మృతి చెందారంటూ ఆయన సన్నిహితుడు చెప్పిన మాట సోషల్ మీడియాలో తెగ వైరల్ అయింది. ఇది చూసిన ప్రముఖ నటుడు మాధవన్ సహా మరికొందరు సినీ సెలబ్రిటీలు కామత్ మృతి పట్ల సంతాపం ప్రకటించారు. అయితే ఆయన పరిస్థితి విషమంగా మాత్రమే ఉందని ఆసుపత్రి వర్గాలు వెల్లడించాయి. ఆయన సన్నిహితుడు మిలాప్ జవేరి సైతం ఇదే విషయాన్ని వెల్లడించారు.
బాలీవుడ్‌లో ‘దృశ్యం, ముంబై మేరీ జాన్, మదారి’ తదితర చిత్రాలను తెరకెక్కించిన నిషికాంత్ కామత్ పరిస్థితి ఆందోళనకరంగా ఉంది. కాలేయ సమస్యతో బాధపడుతున్న ఆయన ప్రస్తుతం హైదరాబాద్ గచ్చిబౌలిలోని ఏఐజీ ఆసుపత్రిలో చికిత్స పొందుతున్నారు. అయితే కామత్ సన్నిహితుడు మరాఠి నటుడు జయవంత్ వాడ్కర్ మాట్లాడుతూ.. ఆయన చనిపోయారని వెల్లడించారు. ఆ తరువాత నటుడు మాధవన్ సహా మరికొందరు సెలబ్రిటీలు కామత్ మృతి పట్ల సంతాపం కూడా వ్యక్తం చేశారు.
కాగా.. తొలుత కామత్ జాండీస్‌తో పాటు మరో సమస్యతో ఆసుపత్రిలో జాయిన్ అయ్యారని పరీక్షలు నిర్వహించగా తీవ్ర కాలేయ సంబంధిత వ్యాధితో బాధపడుతున్నారని తెలిసిందన్నారు. అయితే ఆయన పరిస్థితి విషమంగా ఉన్నప్పటికీ.. నిలకడగా ఉందని ఆసుపత్రి వర్గాలు వెల్లడించాయి. కామత్ సన్నిహితుడు మిలాప్ జవేరి సైతం తొలుత ఆయన మరణించారని ట్వి్ట్టర్ వేదికగా వెల్లడించారు. అనంతరం హాస్పిటల్‌లో కామత్‌తో ఉన్నవారికి కాల్ చేశానని.. ఆయన మరణించలేదని.. మరింత క్రిటికల్ పొజిషన్‌లో ఉన్నారని వెల్లడించారు.