పూణేకు ‘ఆర్ఆర్ఆర్‌’
- IndiaGlitz, [Thursday,March 12 2020]
రాజ‌మౌళి ద‌ర్శ‌క‌త్వంలో ఎన్టీఆర్, రామ్‌చ‌ర‌ణ్ క‌థానాయ‌కులుగా న‌టిస్తోన్న చిత్రం ‘ఆర్ఆర్ఆర్‌’. డి.వి.వి.దాన‌య్య నిర్మాత. భారీ బ‌డ్జెట్‌తో రూపొందుతోన్న ఈ సినిమాను ‘బాహుబ‌లి’ త‌ర్వాత రాజ‌మౌళి తెర‌కెక్కిస్తుండ‌టంతో సినిమాపై భారీ అంచ‌నాలు ఏర్ప‌డ్డాయి. సినిమా షూటింగ్ శ‌ర‌వేగంగా జ‌రుగుతుంది. కొమురం భీమ్‌గా న‌టిస్తోన్న ఎన్టీఆర్ జ‌త‌గా బ్రిట‌న్ భామ ఒలివియా మోరిస్ న‌టిస్తుంటే.. అల్లూరి సీతారామ‌రాజు పాత్ర‌ధారిగా న‌టిస్తోన్న రామ్‌చ‌ర‌ణ్ జ‌త‌గా బాలీవుడ్ బ్యూటీ ఆలియా భ‌ట్ న‌టిస్తుంది. వ‌చ్చే ఏడాది జ‌న‌వ‌రి 8న విడుద‌లకానుంది.
లేటెస్ట్ సమాచారం మేరకు ఈ సినిమా నెక్ట్స్ షెడ్యూల్‌ను పూణేలో చిత్రీక‌రించ‌బోతున్నార‌ట. సినిమా ప్రారంభం నుండి ఇప్ప‌టి వ‌ర‌కు హైద‌రాబాద్‌లోనే చిత్రీక‌ర‌ణ జ‌రుగుతూ వ‌స్తుంది. గ‌తంలో పూణే షెడ్యూల్ ప్లాన్ చేసుకున్న‌ప్ప‌టికీ రామ్‌చ‌ర‌ణ్‌కు గాయం కావ‌డంతో షూటింగ్ పోస్ట్ పోన్ అయ్యింది. దీంతో సినిమా షూటింగ్ కొన్నిరోజుల పాటు ఆగింది. ఇప్పుడు ఆ షెడ్యూల్‌ను చిత్రీక‌రించ‌బోతున్నార‌ట. ఈ షెడ్యూల్‌లో బాలీవుడ్ బ్యూటీ ఆలియా భ‌ట్ పాల్గొన‌బోతున్నారని సమాచారం. ఈ సినిమా టైటిల గురించి కూడా పెద్ద చ‌ర్చే జ‌రుగుతుంది. తాజాగా ఈ చిత్రానికి ‘ర‌ఘ‌ప‌తి రాఘ‌వ రాజారాం’ అనే టైటిల్ పెట్టాల‌నుకుంటున్న‌ట్లు వార్త‌లు విన‌పడుతున్నాయి. మరి చివరకు ఏ టైటిల్‌ను పెడ‌తారో తెలియాలంటే వేచి చూడాల్సిందే..