ద‌ర్శ‌క‌ధీరుడు రాజ‌మౌళి, యంగ్ టైగ‌ర్ ఎన్టీఆర్‌, మెగాప‌వ‌ర్ స్టార్ రామ్‌చ‌ర‌ణ్ కాంబినేష‌న్‌లో రూపొందుతోన్న ప్రెస్టీజియ‌స్ చిత్రం ‘రౌద్రం ర‌ణం రుధిరం’(ఆర్ఆర్ఆర్‌). ఇందులో మ‌న్యం వీరుడు అల్లూరి సీతారామ‌రాజు పాత్ర‌లో మెగాప‌వ‌ర్‌స్టార్ రామ్‌చ‌ర‌ణ్.. గోండు వీరుడు కొమురంభీమ్ పాత్రలో యంగ్ టైగ‌ర్ ఎన్టీఆర్ నటిస్తోన్న సంగ‌తి తెలిసిందే. రెండు నిజమైన చారిత్ర‌క పాత్రల క‌ల్పిత‌గాథే ఈ చిత్రం. రూ.400 కోట్ల‌తో డి.వి.వి.దానయ్య నిర్మిస్తోన్న ఈ చిత్రంలో ఎన్టీఆర్ జోడీగా బ్రిటీష్ భామ ఒలివియా మోరిస్ న‌టిస్తుండ‌గా రామ్‌చ‌ర‌ణ్ జోడీగా బాలీవుడ్ బ్యూటీ ఆలియా భ‌ట్ న‌టిస్తోంది.

ఈ సినిమాను ముందు ఈ ఏడాది జూలై 30న విడుద‌ల చేయాల‌నుకున్నారు. అయితే చిన్న చిన్న కార‌ణాలు, మేకింగ్‌లో కాంప్ర‌మైజ్ కావాల‌నుకోక‌పోవ‌డంతో వ‌చ్చే ఏడాది జ‌న‌వ‌రి 8న విడుద‌ల చేస్తామ‌ని అధికారికంగా ప్ర‌కటించారు. కానీ లేటెస్ట్ స‌మాచారం మేర‌కు ఇప్పుడు ఈ సినిమా విడుద‌ల వ‌చ్చే ఏడాది స‌మ్మ‌ర్‌కు పోస్ట్ పోన్ అయ్యిందని, బాహుబ‌లి 2 విడుద‌లైన ఏప్రిల్ 28నే ఆర్ఆర్ఆర్ సినిమాను విడుద‌ల చేయాల‌ని రాజ‌మౌళి భావిస్తున్న‌ట్లు వార్త‌లు విన‌ప‌డుతున్నాయి. అయితే ఇది వ‌ర‌కు రిలీజ్ డేట్ పోస్ట్ పోన్‌పై వ‌చ్చిన వార్త‌ల‌పై ఆర్ఆర్ఆర్ మోష‌న్ పోస్ట‌ర్, భీమ్ ఫ‌ర్ రామ‌రాజుల్లో అదేం లేద‌ని క్లారిటీ ఇచ్చారు. ఇప్పుడు మ‌రోసారి ఆర్ఆర్ఆర్ విడుద‌ల తేదీ వాయిదా ప‌డింద‌ని వార్త‌లు చ‌క్క‌ర్లు కొడుతున్నాయి. మ‌రి దీనిపై రాజ‌మౌళి అండ్ టీమ్ ఎలా స్పందిస్తుందో చూడాలి.