మెగాస్టార్ చిరంజీవి, ఇప్పుడిప్పుడే యూత్‌లో మంచి క్రేజ్ సంపాదించుకున్న క్రేజీ స్టార్ విజ‌య్ దేవ‌ర‌కొండ క‌లిసి ప‌నిచేయ‌నున్నారా? అంటే అవున‌ని సినీ వ‌ర్గాల్లో గుస‌గుస‌లు విన‌‌పడుతున్నాయి. వివ‌రాల్లోకెళ్తే.. మెగాస్టార్ చిరంజీవి 153వ చిత్రంగా ‘లూసిఫర్’ను రీమేక్ చేయనున్న సంగతి తెలిసిందే. యంగ్ డైరెక్టర్ సుజిత్ ఈ చిత్రాన్ని తెర‌కెక్కించ‌నున్నారు. ఈ సినిమాకు సంబంధించిన ప్రీ ప్రొడ‌క్ష‌న్ ప‌నులు జ‌రుగుతున్నాయి. మ‌ల‌యాళ లూసిఫ‌ర్ సినిమాలో కీల‌క‌మైన పాత్ర‌ల్లో ఒక‌టైన పృథ్వీరాజ్ పాత్ర‌ను తెలుగులో ఎవ‌రు చేస్తారు? అనేది ఆస‌క్తిక‌రంగా మారింది.

ఈ పాత్ర‌లో న‌టిస్తార‌ని ముందుగా బ‌న్నీ ఆ త‌ర్వాత రానా ద‌గ్గుబాటి పేర్లు ప్ర‌ముఖంగా వినిపించాయి. తాజాగా ఈ లిస్టులో విజ‌య్ దేవ‌ర‌కొండ పేరు చేరింది. ఇప్ప‌టి వ‌ర‌కు స్టార్ హీరోల సినిమాల్లో న‌టించ‌ని విజ‌య్ దేర‌వ‌కొండ, మ‌రి చిరంజీవితో న‌టించ‌డానికి ఓకే అంటారో లేదో చూడాలి. ప్ర‌స్తుతం చిరంజీవి త‌న 152వ చిత్రం ‘ఆచార్య‌’ను పూర్తి చేయ‌డానికి సిద్ధంగా ఉన్నారు. అలాగే మ‌రోవైపు విజ‌య్ దేవ‌ర‌కొండ హీరోగా రూపొందుతోన్న ‘ఫైట‌ర్’ సినిమా కూడా చిత్రీక‌ర‌ణ ద‌శ‌లో ఉంది. ఈ సినిమాలో విల‌న్‌గా జ‌గ‌ప‌తి బాబు న‌టిస్తార‌ని టాక్‌. అలాగే చిరు సోద‌రి పాత్ర‌లో ఎవ‌రు న‌టిస్తార‌నేది కూడా ఆస‌క్తిక‌రంగా మారింది. త్వ‌ర‌లోనే ఈ వార్త‌ల‌పై ఓ క్లారిటీ రానుంది.